Kinsa kaha ang ituboy?

Human sa katapusang State of the Nation Address (SONA) ni Presidente Benigno Simeon "Noynoy" Aquino karong hapon dili na unya kapugngan ang paggimok sa mga politiko sa ilang pagposisyon alang sa umaabot nga election sunod tuig.

Kini ilabi na kun moendorso na si Presidente Aquino og standard bearer alang sa Liberal Party.

Sa pagka karon, daghan ang naghuwat kinsa kanila ni DILG Secretary Mar Roxas ug Senador Grace Poe ang ituboy ni PNoy pagka-presidente sa 2016 elections.

Gihimoan na gani og mga pagtandi ug pag-analisar sa katawhan ang posible’ng kamada sa mga mokandidato pagka presidente.

Kinsa kaha ang ituboy ni PNoy? Si Mar Roxas nga kanunay'ng nagmatinud-anon ug loyal sa pagpatuman sa iyang mga programa? o si Senador Grace Poe nga bisan og dili siya kapartido sa Liberal apan dinapit nga kandidato kansang popularidad nisulbong ug nakapakita og maayo nga trabaho sa senado.

Posible ‘sab nga si Vice President Jejomar Binay, apan hinuon daan na nga mipahibalo si Presidente Aquino nga dili makakuha sa iyang bendisyon si Binay ug mao gani nga nangatake na si Binay sa administrasyon. Nahibaw-an nga ang pamilya’ng Aquino dili gayud malimot og utang kabubot-on. Lingia ang nahitabo kaniadto ni anhing Senador Ramon Mitra, Jr. diha’ng milansar kini pagka presidente sa nasud.

Daghan ang nagtuo nga si Mitra mao g’yud ang ituboy ni anhing Presidente Cory Aquino apan sa takulahaw lang, si Fidel V. Ramos ang gituboy ni Cory nga kandidato pagka presidente.

Kini tungod sa daku’ng utang kabubot-on ni Cory ngadto ni Ramos atol sa Edsa People Power Revolution. Si Ramos kaniadto maoy AFP Chief of Staff nga mialsa batok sa administrasyon ni kanhi Presidente Marcos.

May utang kabubot-on ang mga Aquino ni Binay kay usa kini sa nibabag sa daghang coup attempts batok sa administrasyon ni anhing Presidente Cory. Gani, nahatagan siya og pasidungog nga "Outstanding Achievement Medal" ug gitawag nga "Rambotito" gikan sa salida ni Sylvester Stallone nga Rambo.

Kun kahigayonan sa pagdaog ang hisgotan tali sa tulo, kanunay mangiwit si Mar Roxas. Kun survey ang basehan sigurado nga dili modaog si Roxas.

Apan matud sa mga political observers nga kun si Roxas ang i-endorso ni Presidente Aquino ug sa Liberal Party, daku ang kahigayonan nga modaug si Roxas.

Daku ang bentaha kun suportado sa administrasyon ang usa ka kandidato, tungod sa makinarya nga mopalihok sa pagpangampanya ug labaw sa tanan ang impluwensya sa budget sa election.

Sa tigum ni PNoy ug Poe sa niagi’ng semana, giingon nga nasemento na ang desisyon sa senador nga modagan sa mas taas nga posisyon. Wala pa hinoon maklaro kun sa pagka-presidente ba o bise-presidente.

Kun makahukom si Poe nga modagan pagka-presidente, andam ba nga isakripisyo ni PNoy ang loyalty ni Roxas sa iyang administrasyon tungod ug alang sa kasiguroan sa pagdaog?