Binay nag-una gihapon

Bisan sa mga bug-at nga issue batok ni Vice President Jejomar Binay, nagpabilin siya nga nag-una sa mga survey nga gihimo, hinuon nag-anam kini’g tidlum.

Nagpasabot ba kini nga ang mga respondents sa survey, wala motuo sa mga akusasyon  ngadto kang Binay? Or perhaps, ang katawhan, labi na ang masa, mi-identify ug mi-associate sa ilang kaugalingon ngadto kang Binay nga alang kanila ilang kauban, ilang ka-masa, regardless sa mga issue. After all, ang issue sa corruption, matinuod man o dili, alang sa masa, kinsa man sa ato karon nga mga political leaders ang wala malambigit niini, ug nganong si Binay ra man ang gipuntariya? Tungod ba kay nag-una siya sa survey?

On the other hand, kinahanglan g’yud tubagon ni Binay ang mga akusasyon, uban sa mga ebidensiya, kay kadto’ng iyang pagkakak pag-atubang sa Senado ug pakig-debate uban kang Sen. Antonio Trillanes, medyo nakadaut sa iyang credibility. Nga kun magpadayon nga dili matubag ang maong mga issue, hangtud sa adlaw sa election, tingali’g mao ra kini unya ang makaingon sa iyang kapildehan. Sa pagkakaron ra ba, wala pay issue sa corruption ang gilabay ngadto kanila ni DILG Sec. Mar Roxas ug Sen. Grace Poe.

* * *

Giingon nga wala nay “pork barrel” sa 2015 national budget. Sa ato pa, wala nay salapi nga makawat. Apan ang taga-opposition wala motuo niini. Miingon sila nga gitagoan ang pork barrel, aron di makit-an sa katawhan.

Alang kanila, padayon ang pork barrel. Gani, giingon nga ang 2015 budget puno sa mga election provisions. Sa ato pa, mga allotment alang sa pagpadaug sa mga kandidato sa administrasyon. Kinsa may atong tuohan niini, ang administration o ang opposition? Take your pick!. Ang kuyaw kun ang duha namakak.

* * *

Dugang convenience stores ang atong mapaabot nga motuybo dinhi sa atong nasud sa tuig 2015. Ang Lawson Inc.,usa ka dako’ng convenience store sa Japan, giingon nga naglaraw pagpabarog og 2,000 ka convenience store chains sa tibuok nasud, sulod sa duha ka tuig. Kini uban sa pakig-partner sa local nga mga negosyante .

Matud sa Lawson management, “the Philippines is very strong in consumption.” Tinuod, labi na sa pagkaon. Kay kita’ng mga Pinoy, kumakaon g’yud. Kun madayon, kita ang ikatulo nga nasud dinhi sa Southeast Asia nga butangan sa ilang negosyo. Aduna sila’y 61 branches sa Indonesia, ug 29 sa Thailand.