Ngipon sa ordinansa

Ang atong mga magbabalaud abtik kaayo nga mopanday og mga balaud, apan ang atong mga law enforcers hinay kaayo mopatuman   pagdakop sa mga malapason. Tungod niini, mas daghan ang pagsupak kay sa pagtuman.

Dinhi sa atong dakbayan sa Sugbo, bag-o lang napasar ang usa ka ordinansa nga magpahamtang og silot sa mga motorcyclist nga saba kaayo’g tambutso. Hinaut nga hatagan kini’g ngipon sa mga law enforcers. Basin kun mahisama lang kini sa pipila ka ordinansa nga kutob lang ta sa papel.

Wa man gani kita makapatuman sa wearing of helmets, sa anti-pollution, over speeding ug over loading, no smoking in public places, anti-littering, jaywalking, ug daghan pa’ng mga traffic rules and regulations nga gi-ignore lang sa mga motorista.

Kun mapatuman ang maong ordinansa, usa kini ka dako’ng relief alang sa mga lumolupyo ning dakbayan nga gidaugdaog sa mga motorcyclist, wala’y pagtagad sa dako’ng kahasol nga ilang mahimo gumikan sa kasaba sa ilang motorsiklo.

Pukawon ka sa tunga’ng gabii ug kaadlawon, ug dili ka pakatulgon sa udto kay ila ka’ng papaminawon sa kasaba sa ilang tambutso.

Duna ko’y kaila nga tag-iya og pension house. Matud niya, mangreklamo kuno ang ilang mga guests tungod sa kasaba sa mga motorsiklo .

Dugay na kaayo ning problemaha, apan ambot ngano nga karon pa kini matagad sa city government. Duna ta’y mga karaang anti-noise ordinance. Mura man og dili na to relevant karon. Gawas pa, wa man ‘sab to mapatuman.

Akong usbon, hinaut nga mapatuman kining maong ordinansa kay sa ako nang giingon, usa kini ka dakong alibyo alang sa mga nagpuyo ning dakbayan.

* * *

Ingon sa nag-ilogay karon sila si Vice President Binay ug DILG Secretary Mar Roxas kun kinsa kanila’ng duha ang tinuod nga “Mr. Palengke.”

Sa mga pagsuroy-suroy ni Binay sa lainlaing mga dapit sa nasud, dili gayud niya kalimtan ang pagbisita sa mga merkado. Wala tingali siya malimot nga ang pagka “Mr. Palengke” ni Roxas maoy nakapa-number one niya sa 2004 senatorial election.

Ug karon, mi-claim ang kampo ni Binay nga ang tinuod nga Mr. Palengke mao si Binay kay siya g’yud kuno ang mangunay pag-pamalengke.

Pareho diay mi si Binay, kay ako may suguon ni mama sa una pagpangompra, gani hangtud karon, ako man gihapon ang tigpangompra sa Carbon.

Maayo ‘sab tingali nga molansar ko pagka-presidente kay tinuod g’yud ko nga Mr. Palengke.

Karon, niining pagsuroysuroy ni Binay sa mga merkado, dili kini pangampanya, kondili, igo lang siya’ng nagtuman sa iyang kaakohan isip cabinet member ni Noynoy.

Sa ato pa, official ang iyang pagsuroy-suroy, gasto sa lungsod.