EDITORYAL - Wa’y pangandam ni Queenie?

Bisan sa kahinay sa tropical storm Queenie nga miigo sa Central Visayas duha ka adlaw na ang milabay apan nakapatay kini og usa ka tawo ug usa ang na-missing samtang gatosan ka pamilya ang napugos pagsungasong sa pagbunok sa uwan aron pagbiya sa ilang mga balay.

Gani dul-an usa ka libo ka balay ang nalunopan sa habagatang bahin sa lalawigan sa Sugbo  ug gani duna g’yuy nabanlas tungod sa kalit nga pagsaka sa tubig sa mga sapa duol sa ilang mga balay.

Tungod sa nahitabo, nasagmuyo ang pangulo sa Provincial Disaster Risk Reduction and Management Council nga si Baltazar Tribunalo.

Wala magkulang ang lalawigan sa pahimangno sa publiko bahin sa bagyo, gani usa ka adlaw sa wala pa kini muabot sa Sugbo, mideklarar na nga way klase ang tanang levels sa public schools aron dili mabutang sa peligro ang mga bata.

Siguro kuwang pa g’yud og pagsalig ang katawhan sa abilidad sa mga local disaster managers sa ilang mga lugar. Rason nga di sila tuohan ug ipalapos lang sa pikas dunggan ang ilang pahimangno.

Dili angay basulon ang publiko niini. Kinahanglang maninguha pa g’yud ang maong mga hingtungdang ahensya aron sila katuohan ug tahuron. Wala pa kaayo makasabot ang katawhan sa ilang papel ilabi na nga dunay uban nga sakop sa local disaster teams nga badlungon ug di kasaligan mao nga dili mosalig ang katawhan kanila.

Maayo usab kun aktibo ang barangay sa ilang mga tahas bahin sa disaster mitigation aron mamenusan ang impact sa mga kalamidad.

Ang nahitabo sa habagatang bahin sa Sugbo usa ka pagpahinumdom sa mga naa sa katungdanan nga kinahanglan pa nilang palambuon ang ilang mga programa.

Kinahanglang ma-empower ang katawhan sa ilang mga responsibilidad makab-ot ang kanunay gitinguhang “zero casualty” matag dunay umaabot nga mga katalagman.