Dili g’yud magdinanghag

Nakasinati na kita karon sa grabe’ng kainit ug epekto daw kini sa gitawag nila nga El Ñino Phenomenon. Unsa may epekto sa grabe’ng kainit karong mga panahona?

Maapektohan ba ang suplay sa tubig? Alang sa kasayuran sa tanan, ang epekto nga mamugna sa grabe’ng kainit mao ang pagkauga sa atong mga butang ug uban pa’ng mga edipisyo. Tungod sa grabe’ng kainit sa panahon ug tungod sa pagdanghag, dali ra unya nga moulbo ang kayo.

Mao nga atong isiguro nga ang tanang mga butang sama sa lighter ug posporo hiposon g’yud sa lugar nga dili maabot sa mga bata. Isiguro nga ma-check ang LPG tank regulator ug hose sa posible’ng pag-leak niini, isiguro nga mapa-check sa lisensyado’ng electrician ang atong electrical wirings sa panimalay.

Sa pikas bahin, usa sa mga epekto sa atong nasinati’ng grabe’ng kainit mao ang pagkunhod sa suplay sa tubig. Mahuna-hunaan ba nato nga kun adunay dako’ng sunog nga moulbo sa usa ka lugar ug magkuwang ang suplay sa tubig dili ba kaha kini makalilisang huna-hunaon?

Sa maong paagi, giawhag ang publiko sa dili pag-usik-usik sa tubig kay lagi dako kaayo kini’g gamit sa atong kabomberohan. Subay sa akong nahisgutan, dunay usa ka organisasyon, ang Rotary Club of Cebu, diin duna sila’y pagahimoon nga usa ka proyekto nga mao ang pagtukod og dagko’ng Water Reservoir sa mga strategic locations sa Metro Cebu.

Anaa pa hinoon sa initial nga pakigsabot tali sa maong organisasyon ug sa Bureau of Fire Protection Region 7, dako unya kini og ikatabang sa atong kabomberohan ilabi na sa pagresponde sa sunog ang maong proyekto. Ang inyong kabomberohan maglaum nga dunay ubang mga private organizations nga mohimo og lakang o mga proyekto nga makatabang sa puwersa sa atong kabomberohan.

FO3 Wendell C. Villanueva, BFP