Dakong hostage

Daghan sa mga Sugboanon ang puwerte nga nasagmuyo sa wala pagkaapil sa Sugbo sa itinerary ni Pope Francis sa iyang pagbisita sa Pilipinas sa sunod tuig alang sa mga biktima sa mga kalamidad sa Kabisayaan.

Sa gianunsiyo sa kadagkoan sa simbahan, halos tua lamang sa kaulohan ang schedule sa Santo Papa sa iya unya nga pagduaw sa nasud karong Enero. Naglakip sa iyang itinerary sa Manila mao ang pagpakigtagbo ni Presidente Aquino ug mga importanteng tawo didto.

Modalikyat ra kuno siya sa Leyte alang sa mga biktima sa Typhoon Yolanda. Kini alang sa usa ka dakong misa uban sa mga survivor ug pagduaw sa mass grave sa dakbayan sa Tacloban sa dili pa siya mohapit sa lungsod sa Palo, Leyte.

Human niini, molupad dayon siya’g balik sa kaulohan. Ug sa iyang schedule, wala gayud namensiyon ang Sugbo, kansang norte nga bahin ang dako usab og kadaut mugna sa pagkusokuso ni Yolanda.

Tungod niini, daghan sa mga Sugboanon ang nasubo. Nag-expect man gud sila nga maapil gayud ang Sugbo sa schedule ni Santo Papa. Kini ilabina nga liboan ka mga Sugboanon ang nabiktima usab sa maong trahedya.

Hinuon miapela ang dakbayan sa Sugbo ngadto sa Vatican sa pag-apil sa probinsiya sa itinerary sa Santo Papa. Ug nanghinaut si Mayor Michael Rama nga mangusog usab ang Kapitolyo sa kampanya alang ni Pope Francis pagdalikyat usab sa Sugbo.

Pipila na hinuon ang mikuwestiyon ngano nga ang dakong bahin sa pagbisita ni Pope Francis sa Pilipinas atua na hinuon gigahin didto sa Metro Manila. Kini bisan pa man sa rason nga wala gyuy epekto si Yolanda didto. 

Dili nato mabasol kun adunay mga Sugbuanon nga mag-alburoto niining mao nga isyu. Kini gumikan kay sa kaimportante sa Sugbo, ug sa ka dako sa kadaut niini gikan ni Yolanda, wala silay nakita nga rason ngano nga dili maapil ang probinsiya sa itinerary sa Santo Papa.

Niining maong sitwasyon, sama ra unya nga ma-hostage ang Santo Papa didto sa kaulohan. Tungod ba kay tua didto ang sentro sa atong kagamhanan?

Angay natong pahimangnoan ang mga organizer sa papal visit nga ang rason pag-anhi ni Pope Francis sa Pilipinas mao ang mga biktima sa kalamidad ug dili kadtong mga dagko ug halangdon sa sosyodad.