Ayaw ninyo daginota

Usa ako sa wala makauyon niini’ng awhag alang sa mga senior citizens sa dakbayan sa Sugbo pag-donate og salapi gikan sa ila nga financial assistance sa dakbayan alang sa katukoran sa bag-o nga Cebu City Medical Center.

Mora’g wala na tingali lain nga kapadulngan ang kagamhanan sa kampanya niini paghakot og pundo alang sa bag-ong city hospital, kansang karaan nga building ang naguba sa diha nga mitay-og ang makusog nga linog sa niagi nga tuig. Ug nga ang mga tigulang na hinuon ang gipuntarya niini’ng mao nga kampanya. Komusta na man diay ang una nila nga krusada paghimok sa katawhan ning dakbayan pagtabang sa mao’ng proyekto pinaagi sa “Piso Mo, Hospital  Ko” campaign?

Ambot kun misaler ba kaha kadto’ng “Piso” campaign. Sa ako nga namatikdan, mora og bugnaw man ang response sa katawhan niadto. Siguro kulang kadto sa maayo nga estratehiya, sama sa halapad nga information drive. Ug niini’ng sugyot ni Rolando Llaguno, ang hepe sa Office of the Senior Citizens Affairs sa dakbayan sa Sugbo, nakasiguro ko nga daghan sa ato’ng katigulangan ang magpangalut unya sa ila’ng mga ulo.

Kini tungod kay dili ikalimod nga dako na kana’ng P2,000 nga makaltas sa ila nga hinabang pinansiyal gikan sa kagamhanan sa siyudad. Ilabina niini’ng panahona nga gikinahanglan kaayo nila ang kuwarta alang sa ila’ng mga sakit.

Hinuon wala nangayo ang ato nga katigulangan og hinaba’ng pinansiyal gikan sa dakbayan. Ang lokal nga kagamhanan ang nagtingal kanila niini. Ug tungod lagi kay gipamulitika na kini, misulbong ang mao’ng hinabang ngadto sa P12,000 karo’ng tuiga.

Apan inay nga malipay sila sa dako nga hinabang, siguro daghan kanila nga magbagutbot tungod niini’ng pagtibhang sa mao’ng financial assistance. Suwerte si Mayor Michael Rama tungod kay dili eleksiyon karo’ng sunod nga tuig.

Niini’ng mao nga lakang, daghan na hinuon ang makaingon nga mora’g desperado na ang kagamhanan sa dakbayan sa Sugbo sa lakang niini’ng paghakot og dugang pundo alang sa katukoran sa bag-ong city hospital.  

Dagha’ng paagi ang dakbayan pagkuha og dugang pundo alang sa CCMC. Kini sama sa pagbaligya og lote diha sa South Road Properties. Kay kun ang hinabang sa mga senior citizens maoy daginoton, daghan gayud ang moalsa niini.