Brgy Bairan, City of Naga

 “Sir Jun palihog mi’g pabadlong aning tag-iya’g tricycle duol sa barangay hall kay naa ra man sa karsada gi-parking unya kun naay moaging motor maglisod nag agi labi na kung dunay kasugat.”

Brgy Basak-San Nicolas Cebu City

“Sa Basak naa diri gamay tindahan ang entrance pulos man tape ang mga baligya unya sa sulod kay naay mga estudyante magpasalida og law-ay wala man gyu’y nakabadlong ani nila nga opisyales namo sa barangay.”

Brgy Patao, Bantayan, Cebu

“Sir Jun hapit na lang mag-usa ka tuig sukad sa pag-igo sa bagyong Yolanda pero hangtod karon wala pa mi ka patukod balay kay wala mi kadawat og mga hinabang hangtod karon nagtrapal pa gihapon mi.”

Brgy Tingo, Lapu-Lapu City

“Naunsa na man ning amo lugar nga migrabe na man hinuon ang problema sa ilegal nga drugas daghan na kaayo namaligya ug nga naadik nga mga batan-on diri kay wala may nakabadlong nga mga opisyal sa barangay.”

Brgy Lamac, Pinamungajan, Cebu

“Sir naunsa na man ning among lugar kay naghitak ang ilegal nga drugas sama na sa shabu, among mga polis diri wala man gyud mohimo’g aksyon batok aning mga tawhana nga nalambigit sa pagpamaligya’g shabu.”

Brgy Adlaon, Cebu City

“Diri sa sitio Intusan kay pwerte na gyong lataa sa karsada lisod na kaayo agian sa mga sakyanan bisan mga suki namong habalhabal driver dili na mohatod kay kuyawan na moagi sa maong lugar.”

Brgy Paknaan, Mandaue City

“Pait kaayo among karsada diri sa 6.5hectare nga luna nga gihimo relocation site kay lapok kaayo kay ang driver sa buldozer tapulan kaayo dili tarungon iyang pagtrabaho maong bisa’g asa na lang punta ang giabunong mga yuta nga maoy nakamugna’g lapok.”

Brgy Dumlog, Talisay City

”Sa Bascon street grabe na ang mga lungag tungod sa tubig nga wala na mag-agi sa kanal ilabi na kun mag-uwan mobaha gyud ang karsada apil na ang usa ka pribadong tunghaan pwerte na gyong lisoda sa among pag-agi diha sa maong lugar Sir.”

Brgy Sinsin, Cebu City

“Diri sa bukirang barangay ang karsada sige lang kabasa kay ang ilang tubig anha pataka lang ipangyabo daghan nang mga motor nadisgrasya tungod sa kadangog.”

Brgy Olivos, Tabuelan, Cebu

“Mangutana lang unta ko Sir kun apil ba mi diri sa calamity assistance sa lungsod sa Tabuelan nga naigo sab sa bagyong Yolanda kay ngano hangtod karon wala pa man mi kadawat sa hinabang.”

Brgy Mabini, Cebu City

“Sir magpatabang mi nimo nga mahunong ning grabing abuso aning nanag-iya og sound system sa among lugar kay way batasan kusog kaayo mopatukar bisa’g gabii na disturbo kaayo namong mga silingan.”

Brgy Tinagdukan, Guihulngan, Negros Oriental

“Sir Jun kusog na sad kaayo ang baligya sa shabu diri sa among lugar maayo untang arion diri sa taga PDEA7 o sa taga NBI7 kay mga polis diri wala may gihimo mura mag apil sa bahin aning payuhot sa shabu.”

* * *

Alang sa inyong mga reklamo text lang sa 09071678643