Husto ang kasaba ni Roxas

Giingong nahiubos ang pipila ka mayor sa lalawigan sa Bohol diha’ng gikasab-an sila ni DILG Secretary Mar Roxas human niya masayri nga wala pa diay masugdi ang pagtukod ug pag-ayo sa mga nangaguba nga mga edipisyo ug mga karsada sa mga lungsod nga grabe’ng naapektohan sa kusog nga linog. Angayan ug tukma lang gayud nga kasab-an ni Secretary Roxas ang mga mayor sa Bohol nga “nangatulog lang sa pansitan” ug wala dayon maghimo sa ilang trabaho.

Kun ako pa ang DILG Secretary dili lang kasaba ang matagamtaman sa mga mayor sa Bohol, ipangkiha ko pa g’yud sila gumikan sa pagpabaya sa ilang trabaho. Sayonan ba kamo nga dugay ra diay ang kwarta nga nakapundo para sa pagpaayo sa mga nangaguba nga edipisyo ug mga karsada apan ila lang kini nga gipakatulog.

Bisan sa pagpahimo og Program of Works and Estimates (POWE) wala pa sila makahimo niini tungod kay wala sila’y mga enhinyero nga makahimo niini. Dili ko makadawat niini’ng mao nga rason kun ako pa ang DILG Secretary kay ang mga lungsod aduna kini mga enhinyero.

Kun ugaling wala man sila, ang mga mayor puwede nga makapangayo og tabang sa mga enhinyero sa lalawigan o ba kaha sa Department of Public Works and Highways.

Ang mga mayor sa lungsod sa Clarin ug Sagbayan angayan gani unta nga magpasalamat sa kagamhanan ni Presidente Noynoy Aquino ug Secretary Roxas tungod kay nakadawat na sila sa pundo alang sa rehabilitasyon pero ang nahisgotang pundo igo lang nila’ng gipakatulog samtang ang uban nga mga dapit nga naigo sa katalagman hangtod karon wala pa makadawat sa ilang pundo sa rehabilitasyon.

Angayan nga daygon ug dili sawayon si Secretary Roxas sa iyang pagpangasaba sa mga mayor sa Bohol nga nagpabaya sa ilang trabaho.