Angay’ng ipa-impeach

Ipa-impeach si Bise Presidente Jejomar Binay.

Ako kining hagit sa mga nagreklamo batok kaniya. Kun walay mopasaka og reklamo’ng impeachment batok sa bise presidente gikan sa mga nagreklamo, mahulagway nato nga ang ilang tumong mao lang g’yud ang pagdaut ni Binay.

Ang imbestigasyon sa senado walay hinungdan. Gigamit lang kini sa mga ambisyoso’ng senador nga sila si Cayetano ug Trillanes ug mga kauban. Ang imbestigasyon sa senado dili na “in aid of legislation” kun dili “in aid na kini sa ilang mga ambisyon.”

Ang senado nag usik-usik lang sa ilang oras nga puwede pa unta’ng magamit sa ubang mga butang nga makapahimulos ang katawhan.

Kun ang mga senador nagtuo nga lig-on ang mga ebidensiya batok sa bise presidente, awhagon na lang unta nila sila si Atty. Bondal ug kanhi bise mayor Ernesto Mercado sa pagpasaka og kasong impeachment.

Ang duha dili maglisod sa pagkuha sa resolution of endorsement alang sa pag-impeach sa bise presidente tungod kay daghan sila og kaalyado sa ubos balay balauranan.

Ubos sa atong batakang balaud mahimo nga makapasaka og kaso’ng impeachment ang pribado’ng indibidwal basta duna lang kini resolution of endorsement gikan sa usa o mga sakop sa ubos balay balauranan.

Ako nagtuo nga adunay basehanan ang mga pasangil batok sa bise presidente mao’ng akong giawhag ang pagpasaka og kaso’ng impeachment batok kaniya inay kay mag-imbestigar ang senado.

Para kanako mas katuohan pa ang impeachment trial kay sa imbestigasyon sa sub-committee sa Blue Ribbon Committee nga gipalibotan sa mga ambisyoso’ng senador.