Ang lifestyle check

Tungod sa sagunson nga pagkalambigit sa mga polis sa mga kahiwian, gipasiugdahan ni DILG Secretary Mar Roxas ang pagpaubos sa mga polis sa lifestyle check.

Kini aron masayran diin gikan ang ilang mga bahandi. Aron walay trampas, si Roxas miingon nga siya mismo ang una’ng magpaubos sa lifestyle check.

Maayo kining nahuna-hunaan ni Secretary Roxas kay dili ikalimod nga aduna gayoy mga polis nga kadudahan ang gigikanan sa ilang mga bahandi.

Dili ikalimod nga igo-igo na ang suweldo sa atong kapolisan karon apan adunay daghan diha nga kun imong kwentahon ang ilang suweldo kuwang kini kun itandi sa ilang gastohan tungod sa kaluho sa ilang kahimtang.

Kun magmalampuson ang tumong sa lifestyle check seguro mamenus-menosan ug magpanagana na unya sa paghimo og kahiwian ang kapolisan.

Pero dili lang seguro ang mga polis ang angay’ng ipaubos sa lifestyle check kay dili man lang sila ang mga badlungon. Labing maayo nga koridason na lang ang pagpahigayon og lifestyle check.

Kun si Secretary Roxas maoy una nga magpaubos sa lifestyle check, mosunod kaha kaniya si Bise Presidente Jejomar Binay?

Ang mga Binay dili magpanuko sa pagboluntaryo sa pagpaubos usab sa lifestyle check kun ilang mapasabot diin sila’g salapi nga gipalit og balay nga adunay elevator ug baboyan nga de air-condition.

* * *

Gibaharan ni Mayor Rodrigo Duterte nga patyon ang mga tawo nga nagpakatap ug nangampanya sa pagpadagan kaniya sa pagka presidente sa nasud.

Sa reaction ni Duterte nakahinumdom lang ko sa namatay nang hari sa komedya nga si Dolphy sa iyang tubag sa dihang gipangutana kun magpapili ba siya sa pagka presidente sa nasud. Ang iyang tubag dakong dili kay basin unya kuno og modaug siya.