Misyon isip mensahero

Dako nga adlaw ugma alang sa ato nga paborito ug kinaham nga tabloid dinhi sa Kabisayaan ug Mindanao. Kini gumikan kay magsaulog na usab ang Banat News sa anibersaryo sa pagkatukod niini.

Mokabat na diay sa 20 ka tuig human sa pagkahimugso ni’ng nag-una nga pamantalaan nga Binisaya sa nasud. Ug niini’ng panahona, padayon ang agresibo nga pagserbisyo niini ngadto sa katawhan. Mora’g gahapon lamang natukod ang Banat News. Apan 20 na diay ka tuig ang nakalabay. Ug nahimo kini nga maoy kasaligan sa inyo’ng inadlaw nga panginahanglan sa mga balita ug inpormasyon.

Dako ko’ng garbo nga kabahin usab sa paglambo niini’ng ma’ong pamantalaan. Sa ako’ng pagka-contributing editor kaniadto ug paka-kolumnista hangtud karon, dako gayud nga prebilihiyo  alang kanako ang pagserbisyo sa mga Sugboanon.

Gani, mokabat na sa 16 ka tuig nga nagbandera kini’ng mao’ng kolum. Pagsugod niini niadtong 1998, ka usa pa kini sa usa ka semana kaniadto – kada Domingo. Ug karon, mabasa na usab kini matag Biyernes. 

Ug dako kini nako nga uta’ng kabubot-on ngadto sa amo’ng mga bosses kinsa wala mahupasi sa ila’ng pagsalig sa ako’ng kapabilidad. Alang kanamo, ang ila’ng pagsalig maoy usa ka challenge sa matag adlaw namo nga pagserbisyo.   

Niini’ng pagpakusog sa amo’ng puwersa, makalaum pa ang publiko nga pabili’ng mag-una matag adlaw ang Banat News paghatud og mga balita ug mahinungdanon nga mga inpormasyon.  Mao kana ang amo’ng misyon isip mensahero sa katawhan. Nga mas palabwan pa namo ang unsa nga amo’ng nakab-ot sa nangagi’ng katuigan aron pagtagbaw pa sa amo’ng mga magbabasa.

Dili gayud kalikayan ang mga challenges sa unahan. Apan sa padayon ninyo nga pagsalig, walay babag nga dili nato malakangan alang sa pagpakusog pa sa amo nga pagpangalagad sa publiko.

Amo’ng assurance ngadto sa amo’ng mga suki nga magpabilin pa ang Banat News isip kasaligan ninyo nga mensahero. Gani, makalaum kamo nga mas pakusgan pa namo ang amo’ng inadlaw nga pagserbisyo ala’ng sa inyo’ng katagbawan. Ang selebrasyon ugma dili alang kanamo dinhi sa Banat News. Alang kini sa tanan kinsa walay huno’ng sa pagsuporta kanamo gikan pa sa pagkahimugso niini’ng inyo nga paborito’ng pamantalaan.