Shabu ug video karera

Good job alang sa mga sakop sa Carbon Police Station nga misakmit og daghang video karera didto sa Ermita kaniadto’ng Domingo.

Karon, may mipahibalo kanako nga anaa na usab ang daghang video karera ug moli-moli nianang daghang kabalayan ug mga tindahan nga luyo ra g’yud sa police station. Kun wala ko masayop, mao kana ang gitawag og Sitio Baho gikan nianang ganghaan sa VECO.

Gikan diha nga lugara, hangtod na sa Sitio Bato, unya lahos na sa likud nga bahin sa Carbon Market Unit 3, pwerte’ng daghana nga video karera diha’ng dapita. Palihog, aksyoni ninyo mga polis nga dili na maghuwat nga si Sir Noli Romana pa ang mo-order.

Salamat daan sa inyong pag-aksyon. Ang nakapaet pa g'yud kay ang report nga miabot nako mga drug pusher ang uban sa mga tawo nga nag-operate niini’ng video karera ug moli-moli diha’ng dapita.

* * *

Angay na g’yud nga ayuhon pagpili ni Ermita Barangay Captain Imok Rupinta ang mga tawo nga himuon niya nga kawani sa barangay. Tiaw mo nga 21 sa iyang 226 ka kawani sa barangay miangkon na lang daan nga sila drug users.

Sa ato pa, usa sa kada napulo ka kawani sa Barangay Ermita mogamit og shabu! Nagpakauwaw na lang kini sila sa ubang mga kawani sa kagamhanan nga sila pa man gani unta ang magsilbi nga modelo sa katawhan.

Kun ako ang kuhaan og huna-huna, dili gayud angay’ng patrabahuon sa kagamhanan kini’ng mao nga mga tawo. Sayonan ka nga 11 sa 21 nga miangkon nga sila drug users mga tanod?

Dili sila mauwaw nga usahay makauban sa pagpanakop sa mga malapason sa balaod sa gidili nga drugas apan sila utro pa diay’ng dakponon? Dili ikalimod nga daghan sa mga tanod magdala-dala pa og armas bisan wala tuguti, unya adis-adis?

Kakuyaw og magpataka na lang og pamusil? Sa tanang barangay dinhi sa dakbayan nga gihimoan og surprise drug test, ang Barangay Ermita walay napositibo kay ang mga adik nga kawani nangangkon na man daan ug wala na lang magpa-drug test.

Ang atong patrabahuon sa barangay Capt. Imok mao kadtong mga tarong nga tawo aron karespetohan sila sa katawhan. Unya, ayaw g’yud sila’g laban-labani Capt. bisan og ang uban kanila nakatampo kaayo og dako sa imong kadaugan.