Pasar si P-Noy

Likod sa daghang mga pagsaway nga gilabay sa administrasyong Aquino, wa’y duha-duha ang akong pagtuo ug pagsalig sa kasamtangan nga pamunoan.

Pasar si PNoy ug dako’ng grado ang iyang nadawat sa pagduma’ sa atong nasud. Sa iyang State of the Nation Address (SONA) kagahapon, iyang giklaro ang mga kalamboan nga nahimo ubos sa iyang pamunoan. Su’d sa upat ka tuig sa maong katungdanan, di’ masulbad sa usa lang ka pamilok ang nagpatong-patong nang problema sa nasud.

Apan kun tan-awon ang mga lakang nga nahimo sa iyang pamunoan, angay lang nga daygon ang presidente sa iyang mga nahimo inay pauwanan sa mga pagsaway.

Ang dugay nang problema sa Mindanao nahatagan og sulbad pinaagi sa paghatag og igong gahum ug kagawasan sa Bangsamoro. Kung mapatuman ug mahatagan og igong gahum ang bag-ong balaod, dako ning uswag sa unsay atong gipaabot nga kalamboan sa Mindanao.

Salamat sa kampanya batok sa kurapsyon ug mas nahatagan og nawong ang atong dugay nang gireklamo nga mapapas—ang mga kiriwan sa gobiyerno.

Karon, bisan kinsa nga mga magbubuhis ang makaingon nga dako’ng kausaban sa pagkolekta sa buhis ang ilang nasinati sa BIR ug uban pang mga institusyon sa gobiyerno nga maoy tigkolekta nato sa kuwarta.

Ubos sa pamunoan ni PNoy, mas tataw ang mga lakang kansang tumong di’ lang ang pagkolekta sa buhis apan ang paggukod sa mga tawo nga nalambigit sa kurapsyon.

Mas nahatagan og kamatuoran ang mga pangangkon nga papason ang kurapsyon karong tulo ka senador ang nagtingkagol na tungod sa mga pasangil sa pangawkaw.

Wa’ pa ni mahitabo sukad nga adunay mga senador gikan sa dagko’ng panga’n sa politika ang napasakaan og kaso tungod sa pagpangawkaw.

Ug kun kaniadto kutob lang ta sa pagdamgo nga mahatagan og unod ug ebidensya ang mga tinguha sa pagtubag sa problema sa kurapsyon, karon nahatagan ni og kamatuoran.

Ang labing mahinungdanon nga nag-irog ang maong kampanya ug nakita sa publiko ang ka sensiro sa gobiyerno batok sa kurapsyon.

Ang positibo’ng pagtan-aw sa kalibutan sa ekonomiya sa nasud usa ka dakong butang nga mopapas sa bati nga imahe sa nasud. Garbo nato nga mahatagan og mga pasidungog ang akong nasud sa international community.

Apan ang kuwang na lang mao nga ang mga Pilipino mismo ang makadayeg sa mga nahitabo sa nasud. Kung magpabilin ‘tang negatibo sa mga panghitabo, kita ang maisip nga babag sa tul-id nga da’n nga gisaad sa gobiyerno.                                    

(Email: [email protected] or [email protected])