Tudloan g’yud og leksyon

Husto g’yud kaayo ang tawo nga nagpadala kanako og text message nga misaway sa mga drayber nga kusog kaayo nga mireklamo bahin sa pagpatuman og dagko nga multa apan sila abusado kaayo kun mag-drive ug angayan lang silotan aron matudloan og leksyon.

Ang holder sa Sim Pack 09231687715 nagkanayon. “Kining mga drayber nga nagprotesta moingon sila nga kusog mangutong ang mga sakop sa CITOM, sila ma’y nagpaanad kay kun madakpan sila dayon og hangyo unya subornohan dayon ang enforcer. Maayo unta og tinud-on na ang pamaagi aron ang mga drayber nga pataka lang og hunong kun magpasakay ug magpakanaog og pasahero bisan anaa sa tunga sa karsada motagam.”

Wala pa matagbaw ang texter, midugang pa. “Siyaro halos kada adlaw nag-drive sila wala g’yud sila makatimaan kun unsay dili angay’ng buhaton? Kun madakpan dayon og pakiluoy, unya tuyoon pagpabadlong.”

Husto g’yud kaayo ang iyang panahom. Kadaghanan sa mga drayber sa mga PUJ sige lang g’yud og reklamo apan wala nila hisguti ang ilang ka-abusado nga magpataka lang og hunong sa mga dapit nga dili angay nga hunongan.

Ang uban pa nga mga drayber, ingon sa hari sa karsada kun mopadagan sa sakyanan sa walay paghuna-huna nga mabag-iran nila ang ubang sakyanan. Nagsalig lang kay sila igo ra man nga mi-drive sa PUJ ug kun maka-aksidente, ang insurance ra man ang bahala, apan ang ilang nabag-iran mao intawon ang masakripisyo.

Para nako, angay g’yud nga tudloan og leksyon ang mga abusado nga drayber. Ang reklamo hinuon sa mga PUV operators kun ngano nga apilon sila sa salaod sa ilang mga drayber, angay kini nga hatagan og pagtagad.

* * *

Kadto’ng mga mipadala nako og report kabahin sa ilegal nga  drugas ug sugal, sama sa video karera, dili na lang nako i-publikar ang ilang mga report – ihatag na lang nako sa mga polis.

Ang inyo’ng mga report nako ibutang ang ngalan sa tag-iya sa balay, dili kay igo lang moingon nga daghan ang video karera ug daghan ang mga pusher sa inyong lugar kay lisud kaayo na.

Sa inyo’ng gihimo susama ra nga miingon mo nga adunay dagum nga anaa sa atubangan sa inyong lugar. Ayaw lang ‘sab pagtumo-tumo og report. Gituyo nako kini  kay ang inyong report ako pa man gud nga i-counter check.