Kusi sa tanlag
Di abogado si Cebu City Councilor Alvin Dizon. Maong wa siya maghunahuna sa kasong nag-ung-ong batok niya ug sa ubang kadagkoan sa City Hall dihang nihukom siya pag-uli sa P20,000 nga calamity assistance. Sa iyang pagpahibawo sa DYAB Radyo Patrol sa iyang hukom, wa maapil ang mga implikasyon sa kaso sa mga sukaranan sa iyang gihimo: Nahasol siya pag-ayo pagkadawat sa kopya sa kasong administratiba nga nagkuwestiyon sa ilang pag-aprobar ug pagdawat sa hinabang bisan wa sila mabiktima sa linog sa Bohol ni sa bagyong Yolanda sa amihanang Sugbo ug silangang Kabisay-an; ug nigaan ang iyang gibati dihang giuli niyang kuwarta ngadto ni City Treasurer Diwa Cuevas.
* * *
Husto si Dizon. Samang husto ang pag-uli sa hinabang sa kawani sa iyang buhatan nga si Roldan Maurin. Samang husto silang Konsehal Bob Cabarrubias ug Konsehal Jun Gabuya sa pagsunod ni Dizon. Samang hustosi Konsehal Nestor Archival sa pagpahibawo ni Cuevas nga iuli sab ang iyang P20,000 sa mosunod nga mga adlaw.
Managsama silang nakamatngon nga mahimong sayop ang pag-aprobar sa City Council sa hinabang. Managsama silang nakaamgo nga wa sila mopaubos sa naandang proseso sa pagtino nga mga biktima ba gyod sila sa katalagman. Ug managsama silang nakahukom nga ang labing makiangayon nga lakang mao ang pag-uli sa hinabang nga mahimong di para nila.
* * *
Sa pikas nga bahin, abogado si Bise Mayor Edgar Labella. Gani giila nga usa sa labing takos ug ligdong sa mga abogado sa Sugbo. Nahimo usab nga direktor sa Visayas Ombudsman sa wa pa mosud sa politika.
Dihang nahinabi siya ni Juve Villar sa programang Ratsada 1512 sa DYAB niadtong Biyernes nipadayag og kabalaka si Labella sa posibleng epekto sa gihimo nilang Dizon ug kaubanan sa hiniusa nilang pagtubag sa kaso atubangan sa Malakanyang. Bugtong nakit-an ni Labella nga bisan sa ilang pag-uli sa kuwarta mga sinumbong gihapon silang Dizon,Cabarrubias, Gabuya ug Archival.
* * *
Labing makiangayon nga nahusay ang pipila ka kontrobersiya tungod sa pagpatigbabaw sa tanlag sa mga hingtungdan. Labing uwahing pananglitan mao ang kaso ni Padre Romeo Obach nga gitunglo sa tibuok kalibotan human nikatap sa Facebook ang video sa iyang pag-insulto sa batan-on nga nanganak nga wa makasal atol gyod sa bunyag sa iyang bata. Apan tungod sa pag-angkon sa sayop ug pagpangayo og pasaylo ni Obach ug sa mga Redemptorista sa Sugbo nahusay ang kontrobersiya sud lang sa upat ka adlaw.
Silang Obach ug ang mga paring Redemptorista di hinuon mga politiko nga modayon og isip sa sukwahi nga mga lakang nga maniobra sa ilang mga kaatbang. Gawas pa, wa igdungog ang atong sistema sa hustisya nga makahusay og mga panagsungi sud lang sa upat ka adlaw.
* * *
- Latest
