Mga iro nga gipasagdan kinsay manubag kun makapaak?

Dear Atty. Divine,

Duna mi silingan nga namalhin na sa pagpuyo sa syudad, apan ang ilang iro gibiyaan lang, duha kini kabuok ug karon nagsuroy-suroy na lang kini dinhi sa among lugar. Ang ako lang pangutana kun pananglitan kun makapaak kining maong mga iro, maobligar pa ba namo ang tag-iya sa pagpabayad nga ila  man kining gibiyaan? Unsa may angayan namong buhaton aron mahipos ning maong mga iro? Hinaut nga imo kong matambagan kun unsay angayan namong buhaton kay duna  mi mga anak basin unya og mapaakan aning mga iro nga gipasagdan lang sa tag-iya. Daghang Salamat. — Leny

Dear Leny,

Basi sa Anti-Rabies Act of 2007 kon R.A. 9482, ang mga pet owners kon tag-iya sa mga mananap kinahanglan gyud nga responsable sa ilang gipanag-iya nga mga hayop sama sa iro. Kun pananglit makapaak ang maong mga mananap hayan ang tag-iya niini mao gyud ang manubag lakip na sa pagbayad sa gastuhan sa pagpatambal ug uban pang mga incidental expenses. Gimando usab sa maong balaod nga ang mga iro kinahanglan gyud nga hiktan ug dili pasagdan nga magsuroy-suroy sa kadalanan ug kinahanglan sab kini nga regular nga pabakunahan og anti-rabbies ug iparehistro gyud. Busa kun kanang maong mga iro nga gipanag-iya sa inyong silingan makapaak hayan manubag gyud sila niini apan ang problema lang kay wa na ra ba sila magpuyo sa inyong lugar. Ang maayo ninyong buhaton karon mao ang pag-report niini ngadto sa inyong barangay o sa City or Municipal Veterinary’s Office aron ilang mapick-up ang maong mga iro kay kuyaw kini nga makapaak. Hinaut nga akong natubag ang imong mga pangutana. Thanks and God Bless.— Atty. Divine

Kun ikaw adunay pangutana may kalabutan sa problemang legal, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.