Task force Calungsod giandam

CEBU, Philippines - Karon pang daan giandam na ang puwersa sa kapolisan nga mobantay sa South Road Properties (SRP) diin tampusisokan sa katawhan samtang maminaw sa kanonisasyon ni Pedro Calungsod didto sa Vatican City, sa Roma sa umaabot nga Oktobre 2012.

Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon nga dako kining garbo nga madayon ang kalihokan karung Oktobre sa SRP.

Matud niya nga ang task force nga iyang umolon maglangkob sa mga sakop sa City Traffic Operation Management (Citom) Traffic Division ug CCPO nga may tagsa-tagsa ka tahas atol sa maong adlaw aron hapsay ug malinawon ang blessing ni Calungsod.

Matud ni Buenafe nga mosuporta sila sa Police Regional Office-7 nga maoy gihangyo sa kadagkoan sa kaparian dinhi sa Sugbo nga magbutang og daghang pulis sa SRP karong Oktobre.

Gipaabot ni Buenafe nga mas daghang langyaw ug lokal nga turista gikan sa lain-laing lugar nga moanhi pagtuyo sa Sugbo aron mosaksi sa maong kalihokan.

Adunay mga dagkong opisyal sa goberno ug politiko gikan sa kaulohan nga moanhi sa dakbayan atol sa maong kalihokan ug kinahanglan nga hapsay ang dagan sa mga sakyanan sa mga kadalanan paingon sa SRP.

Matud ni Buenafe nga susama sa Sinulog ang ilang himuong preparasyon nga adunay mag-atiman sa seguridad sa maong lugar, ilabi na sa seguridad sa mga VIP. (/WC)(BANAT NEWS)