IBP motabang sa mga Senior

CEBU, Philippines - Misanong na ang Integrated Bar of the Philippines (IBP) Cebu City Chapter sa hangyo sa kagamhanan sa Siyudad sa Sugbo nga pahatagon sila og libreng serbisyo alang sa mga senior citizen kansang mga dokumento nagkinahanglan sa maayong subay ug husay sa mga abogado.

Kini agi og reaction sa IBP sa usa ka suwat nga ilang nadawat gikan Office of Senior Citizen’s Affairs (OSCA) gumikan sa   nagkadaghang problema sa mga senior citizen kalabot sa ilang mga dokumento sama sa pagproseso sa ilang mga pension ug uban pa.

Ang legal consultant sa Siyudad sa Sugbo nga si manlalaban Jade Ponce nagkanayon nga nangita siya og lawak sa City Hall aron maoy himoong headquarter alang sa nahisgutang programa.

Samtang nagplano usab karon ang city hall nga modangop ngadto sa mga kadagkoan sa nagkadaiyang unibersidad ning dakbayan aron hangyoon ang ilang mga tinun-an nga moabag usab sa IBP sa paghatag og punto legal nga mga tambag sa mga senior citizen.

Ang paghinlo sa mga rekord sa mga edaran maoy giatubang nga gimbuhation karon ni OSCA Presidente Leonardo Llaguno kinsa nagtinguha nga kahatagan og tukmang serbisyo ang tanang senior ning dakbayan.

Matud pa  ni Llaguno nga maoy kalipay niya nga niining iyang administrasyon sa OSCA kahatagan niya og katagbawan ang tanang ginsakopan niya agi og pagtamod sa tahas nga gipatong kaniya sa kagamhanan ning dakbayan sa pagpanguna ni Mayor Michael Rama. (BANAT NEWS)