Mi-tambling sa kwarta gitumba

CEBU, Philippines - Usa ka kargador og isda nga ex-convict tungod sa kasong pagpangawat ang gipusil sa usa sa tulo ka armadong tawo kagahapon sa ala-una sa hapon luyo sa merkado publiko diha sa barangay Pasil.

Si Bartolome Aragon, 31, residente sa sitio Wakwak sa barangay Sawang Calero, patay diha dayon human nakaangkon og samad pinusilan sa walang mata ug ang bala milapos sa luyo sa iyang ulo.

Usa sa tulo ka mga tawo ang giingong miduol ug mipusil sa biktima samtang nagduyan kini niadtong higayona. Nakuha sa crime scene ang usa ka kabhang sa .45 nga kalibre nga bala.

Si Deborah Encabo, 32, kapuyo sa biktima nga nahinabi sa Banat News mitug-an nga pasado alas-12 kagahapon sa udto, dunay duha ka mga tawo nagsul-ob yellow ug itom nga t-shirt nga naghelmet ang nangita sa iyang kapuyo diha sa ilang balay kay gi-tambling niini ang P300 nga gisugong igpapalit og shabu.

Giangkon ni Encabo nga dugay nang tiggamitan og ginadiling drugas ang iyang kapuyo sukad pa sa ilang panagtipon.

Si SPO1 Ruth Violango sa Homicide Section mibutyag sa Banat News nga dunay gitug-an kanila ang saksi si kinsa ang mamumuno. (BANAT NEWS)