Banat ( Leaderboard Top ), pagematch: 1, sectionmatch: 1

Taxi gi-karnap sa pasahero

CEBU, Philippines -  Naguba ang nawong sa usa ka drayber sa taxi human kini pusposi   og tire range sa iyang pasahero nga mikarnap sa iyang taxi, didto sa Sitio Kawayanan barangay Yati, lungsod sa Liloan kagahapon sa alas 4:45 sa kaadlawon.

Ang biktima mao si Arnold Bejo Oppus, 40, ulitawo, taga Paknaan siyudad sa Mandaue drayber sa taxi nga may plakang GXP-265 nga gipanag-iya sa usa ka Mario Jimenez.

Si SPO4 Remegio Elacion sa Liloan Police mibutyag sa Banat News nga ang biktima namasahero niadtong tungora dihang mipara   ang usa ka pasahero nga nagbitbit og tire range didto sa   barangay Alang-Alang siyudad sa Mandaue ug nagpahatud sa lungsod sa Liloan.

Apan dihang nahiabot na sila sa sitio Kawayanan, mimandar ang maong pasahero nga manaog siya.

Apan dihang mibayad na kini sa iyang plite nga balor og P120 kalit lang mipiti ang ngabil sa biktima dihang nasabak kini sa tire range nga gipuspos sa maong pasahero ngadto kaniya.

Samtang misagiwsiw ang dugo sa ngabil sa biktima, gipatiran siya ug gitukmod hinungdan nga natagak siya sa karsada ug gipadagan sa karnaper ang taxi samtang gibiyaan niini ang biktima sa maong dapit.

Mipara og laing taxi ang biktima ug nagpahatod kini ngadto sa buhatan sa kapolisan.

Sa pagkakaron padayon pang gipangita sa kapolisan ang karnaper ug ang taxi nga gikarnap niini.(WC) (BANAT NEWS)

  • Follow Us: