Manager sa information company gipatay atubangan sa hinigugma

CEBU, Philippines - Gipusil patay ang manager sa Innodata sa usa ka wala mailhing mamumuno samtang kini naghuwat nga ablihan sa gate sa balay sa iyang igsuon aron ipasulod ang iyang motorsiklo niadtong Lunes sa dayon nang tungang gabii diha sa J. Jaca sa Poblacion Pardo ning dakbayan.

Ang biktima giila sa Homicide Section sa Cebu City Police Office mao si Philip Ramos, 36, minyo apan giingong buwag sa iyang asawa ug manager sa maong information company diha sa barangay Subangdako sa dakbayan sa Mandaue.

Sa imbestigasyon nila ni SPO2 Roger Nedamo, PO3 Geoffrey Gutual, PO3 Victor Ayuman ug PO2 Cristobal Geronimo gikan pa sa trabaho ang biktima kuyog iyang hinigugma nga si Agnes Vitco nga usa ka team assistant sa maong kompaniya sakay sa ilang motorsiklo.

Sa dihang nagpaabot ang biktima uban sa iyang hinigugma nga si Agnes nga ablihan ang gate sa balay kalit lang miduol ang usa ka wala mailhing lalaking nag-atang nang daan diha sa gate dayong pusil gamit ang wala matinong kalibre sa armas ug gipusil sa makaduha ka higayon ang biktima sa wala pa matinong hinungdan.

Si Ramos nahiagom og duha ka samad pinusilan sa iyang bukobuko ug ang usa niini milapos sa iyang dughan nga maoy gituohang nakaingon sa iyang hinanaling kamatayon.

Ang kapolisan nakarekober og usa ka empty shell og usa ka slug sa kalibre .45 nga armas diha sa crime scene nga maoy gituohang gigamit sa mamumunong nagsul-ob og ball cap ug green nga t-shirt.

Matud ni Geronimo nga nakit-an pa sa hinigugma sa biktima ang mamumuno nga mibunot sa iyang dalang armas ug gipusil ang biktima.

Human gipusil ang biktima, ang mamumuno daling mipaingon sa nagpaabot nga XRM nga motorsiklong kolor itom ug puti nga gimaneho sa laing lalaki, pakyas usab ang dalaga pagkuha sa plaka niini.

Sa pasiunang pakisusi sa kapolisan nasuta nga walay atraso ang biktima apan tungod sa iyang posisyon nga usa ka manager nga posibling dunay nasilo sa iyang katrabaho.

Apan mitumaw usab ang report nga giingong posibleng problema sa pamilya ang hinungdan nga karon gisusi na usab sa kapolisan. – BANAT NEWS