Banat ( Leaderboard Top ), pagematch: 1, sectionmatch: 1

Pito ka menor ang nanghasi sa Danao

Gisikop sa kapolisan sa Danao ang pito ka mga menor de edad human nanghasi ug nagpabuto sa armas sa barangay Poblacion dakbayan sa Danao kagahapon sa kaadlawon.

Sumala pa ni SPO4 Edgar Gomez nga usa ka tawag ang ilang nadawat ug nagpahibalo nga dunay pito ka mga batan-on nga menor de edad nga nagpangidaron og 15 ngadto sa 17 anyos ang nag-inom-inom atubangan sa karaang city hall sa maong dakbayan.

Atol sa pagresponde nila ni PO2 Ramir Oliverion ilang nasuta nga dunay usa sa grupo ang nag-birthday.

Gumikan sa kahubog gipangbuak nila ang mga botelya ug usa kanila ang nagpabuto sa kalibre .38 nga paltik revolver ug gilabay dayon kini pag-abot sa mga sakop sa kapolisan.

Nakuha ang maong armas nga adunay sud nga usa ka basiyong bala sa kalibre 38 ug usa ka buhing bala apan walay usa sa mga batan-on ang miangkon nga maoy tag-iya sa maong armas.

Gumikan niini ang pito gidala sa Danao Police station ug gikatakda kini nga iduso ngadto sa DSWD.

  • Follow Us: