Mga mayor nahayagan sa Solid Waste Management Act

CEBU, Philippines - Nakig-dayalogo kagahapon ang 32 ka mga mayor sa lalawigan sa Sugbu sa mga sakop sa environmental lawyers ug Ombudsman for the Visayas kabahin sa gipadalang ‘notice to sue’ sa Global Legal Action for Climate Change.

Kini may kalambigitan sa kapakyas sa mga mayor sa kalungsoran ug siyudad sa lalawigan pag-implementar sa Ecological Solid Waste Management Act kon Republic Act No. 9003.

Sa gihimong dayalogo kagahapon, si Atty. Benjamin Cabrido sa GLACC uban ni assistant Ombudsman for Visayas Virginia Palanca-Santiago mipasabot sa kamahinungdanon sa maong balaod.

Ang mga mayor nga mitambong makitang nasurpresa gyud sa eksplinasyon ni Cabrido, gipasabot hinuon sa naulahi nga wala kini magpasabot nga ang mga mayor maoy ilang gukdon kundili ilaha lang buot i-pressure ang local executives.

“The law does not stated that you should put up a sanitary landfill. What the law clearly stipulates is waste segregation at source,” pagpasabot pang Cabrido atol sa General Assembly sa League of Municipalities of the Philippines-Cebu Chapter sa Casino Español.

Ang mayor sa Dumanjug nga si Cesar Baricuatro miangkong nahayagan sa pamahayag ni Cabrido kay   maong wala nila kini mapatuman gumikan sa kakulang nila sa pundo pagtukod og sanitary landfill.

Dugang pa niini nga magkinahanglan pa sila og mga ekipo, access road padulong sa landfill ug mga kawaning momentinar niini.

“Pero after sa explaination ni Atty. Cabrido, mura mi og nahayagan nga di man diay kinahanglan maghimo og landfill,” sumala pa ni Baricuatro kinsa maoy presidente sa LMP- Cebu Chapter.

Si Cabrido miawhag sa mga mayor nga kinahanglang ilang pugson ang mga barangay kapitan sa polisiyang “No segregation, no collection” sa mga basura ug mahimong manubag ang mga mayor kun dili mosunod niini.

“The burden now lies among the barangay captains. They should be the one to fully implement the law,” dugang pang Cabrido.

Ang maong balaod dunay silot nga multang P500,000 ug dugang penalty nga 10 porsiyento sa milabay'ng annual income sa LGU, kadtong mga garbage collector nga mapakyas pagbahin sa basurang malata ug di malata pamultahon og P3,000. Samtang kadtong maghugaw-hugaw pamultahon og P1,000 ug usa ka adlaw'ng community service.

Mibahad si Cabrido nga dili “joke” ang maong balaod.

Si Baricuatro sa iyang bahin miawhag sa mga mayor pag-isyu og memorandum sa mga barangay kapitan sa ilang mga lungsod pagsunod sa maong polisiya.

Samtang si Santiago-Palanca mipadayag nga nabalaka siyang kadaghanan unya sa mga mayor mag-atubang og kaso tungod lang sa maong mga kalapasan maong midesisyon siyang mopatunga.

Ang RA 9003 miepekto niadtong 2001 ug naimplementar na unta niadto pang 2004 apan ang lungsod lang sa Bantayan maoy mituman niini. (BANATNEWS)