Banat ( Leaderboard Top ), pagematch: 1, sectionmatch: 1

Natagak sa kanal namatay

CEBU, Philippines - Patay ang usa ka lalaki human aksidenteng natagak sa kanal ang gisakyang motorsiklo samtang naglikay sa kasugat nga sakyanan atol sa ilang pag-overtake sa highway sa sitio Mojon barangay Langtad lungsod sa Naga niadtong Domingo sa alas 2:00 sa hapon.

Wala na makaabot nga buhi sa tambalanan si Samuel Borja Dealagdon, 34, taga lungsod sa Aloguinsan apan kasamtangang nagpuyo sa Basak Lapulapu ug nagtrabaho sa MEPZ.

Samtang talandugon sab ang kahimtang sa iyang maguwang nga maoy nagmaneho sa motorsiklo nga si Sammy Dealagdon, 36.

Matud pa ni PO2 Ken Cabrera sa Naga Police dihang nahinabi sa Banat News ang magsuon pabalik na unta sa Lapulapu apan pag-abot nila sa maong lugar nisuway og overtake og sakyanan si Sammy.

Apan kalit lang may mibuthong laing sakyanan sa pikas lane hinungdan nga milihay kini padaplin sa tuong bahin ug nawad-an na hinuon sa kontrol sa manobela ug mitugpa sa open canal daplin sa karsada.

Ang mga estambay sa maong lugar mao nay mitabang sa magsuon ug gihatud sa South General Hospital apan gideklarar nga dead on arrival si Samuel samtang talandugon si Sammy. (Darrel Carumba)   (BANATNEWS)

  • Follow Us: