Banat ( Leaderboard Top ), pagematch: 1, sectionmatch: 1

'Oposisyon preparado vs. Tomas para kongresista

CEBU, Philippines – Gipangandaman na og maayo sa lider sa oposisyon sa dakbayan sa Sugbu, Jonathan Guardo ang lakang nga pagahimuon sa mga sakop sa Bando Osmeña Pundok Kauswagan (BOPK) batok sa ilang grupo sa umaabot nga eleksyon sa sunod tuig.

Si Guardo dihang nahinabi sa Banat News nangandam na silang daan sa kung unsay labing lisod sama sa bag-uhay lang nga pagpahibawong modagan si Cebu City Mayor Tomas Osmeña pagka-kongresista diha sa South District karong election sa 2010.

Matud pa ni Guardo dili malilong nga lig-ong lider si Osmeña lakip na ang partido niining BOPK.

Apan sa pagkakaron dako ang iyang pagtoo nga dili gyud modagan sa pagka-kongresista si Mayor Osmeña tungod kay base sa iyang na-obserbahan mag-usab-usab matag adlaw ang mga pamahayag sa kampo sa BOPK.

“Lig-on gyud na ang BOPK kay ila man ang tanang mga barangay kapitan duna sila'y machinery apan prepared for the worst mi sa panghitabo hinungdan nga nihimo gyud mi sa opposition og kausaban sa program human maparot sa 2007 election,” sumala pa ni Guardo.

Hinuon giangkon niini nga “underdog” gyud ang opposition sa BOPK apan nihimo sila'g mga lakang matag adlaw nga ma-doble ang ilang paningkamot nga makapadangat sa ilang programa nga wala mahatag sa dakbayan.

Masaligon silang mabati sa katawhan ang ilang mga natabang ug nabuhat kanila sa tanang panahon ilabi na sa mga livelihood projects sa kabarangayan ngadto sa mga kababayen-an, pagpahigayon og mga sportsfest sa mga kabatan-unan paglikay sa illegal nga drugas.

Giawhag niini ang mga adviser sa mayor nga hunongon na unta nila ang pagsige'g sulsol niini nga pagpadagan sa pagka-kongresista kini tungod kay aduna kini gipamati sa panglawas.

Gipasabot niini nga dili ikalilong nga ang mga Sugbuanon nakahibalo na sa mga maayong nahimo sa mayor ug naabot na niini ang gustong ipatuman sa pagserbisyo sa katawhan hinungdan nga angayang hatagan og kahigayunan ang mga bag-o pa sa pulitika nga makaalagad sa dakbayan ingon man diha sa South District. – Guam Logroño (BANAT NEWS)

  • Follow Us: