1 patay, 3 angol sa pamusil

Patay ang usa ka lalaki samtang naangol usab ang igsuon niini uban sa duha pa ka tawo human gipamusil sa igsuon sa konsehal sa barangay diha sa barangay Caubian, Isla sa Caubian dakbayan sa Lapu-Lapu kagahapon sa kaadlawon.

Ang namatay mao si Federico Abadajo,31, kinsa naigo sa ulo ug nasamdan usab sa tuong bukton ang manghod niining si Panfilo, 29, human sila pamusila ni Bonifacio Uy, 45, minyo.

Atol sa insidente napagan usab ang barangay tanod nga si Feliciano Sabio ug residenteng si Nida Balansag.

Sumala pa ni PO3 Manolito Abellanosa base usab sa gihimong imbestigasyon ni SPO2 Rolito Jomao-as sa pakighinabi sa Banat News nga gikan pa mitambong sa usa ka kalingawan ang managsuong Abadajo ug pag-abot diha sa ilang lugar nakaaway nila ang suspek.

Matud pa sa kapolisan nga nasuko ang suspek sa managsuong Abadajo gumikan sa kabanha nga namugna gumikan usab sa ilang kahubog. Gikatahong nagkalalis sila sa suspek hinungdan nga milanit kini og wala matinong kalibre sa armas ug gipusil ang duha.

Miresponde ang duha ka tanod apan si Sabio naigo diha sa tiyan samtang ang ginang nga si Balansag kinsa naa ra sulod sa iyang balay naigo usab sa abaga.

Human sa insidente mitahan si Uy ngadto sa iyang maguwang nga si Barangay Caubian Councilor Paterno Uy ug Dr. Sipriano Flores ang health officer sa ilang dapit ug mao nay midala kaniya sa presinto uno.

Ang mga samaran parehong gidala sa Vicente Sotto Memorial Medical Center.