Duha ka motor nagsampok, duha patay

CEBU, Philippines — Duha ang nakalas lakip na ang usa ka Polish national samtang usa ka babaye ang naangol human sila giingong nangalagpot sa panagbangga sa duha ka mga motorsiklo didto sa national highway sa Barangay Sangat, lungsod sa San Fernando kagahapon sa kaadlawon.

Giila ni PO3 Merjukin Misuari sa San Fernando Police Station ang mga nakalas mao silang Romel Saraum residente sa Sibonga kinsang nagmaneho sa Suzuki Raider 150R ug ang langyaw nga si Kacper Chwedeczko, 25, nga nagmaneho usab og motorsiklo nga Yamaha Mio.

Samtang ang babaye nga naangol kinsa maoy angkas ni Chwedeczko giila nga si Lilanie Sinajan ug residente sa lungsod sa Cordova.

Matud pa sa maong polis nga paingon sa Dakbayan sa Carcar si Saraum samtang silang Chwedeczko gituohang gikan sa Moalboal ug paingon sa direksyon sa Dakbayan sa Sugbo.

Pag-abot sa maong lugar nagkabangga ang duha ka mga motor ug nangalagpot ang mga sakay niini.

“Tungod sa kakusog sa impact, pagbangga kay nangalabay sila. Dili baya unta ni blind curve dulhogan ra. Ingon atong orasa makapakusog gyud og padagan kay hawan na man kaayo ang kalsada,” si Misuari miingon sa Banat News.

Dali nga gidala sa Carcar district hospital ang mga biktima apan matud pa ni Misuari nga gideklarar silang Saraum ug Chwedeczko nga dead on arrival.

Samtang gibalhin sa tambalanan sa Dakbayan sa Sugbo si Sinajan tungod sa ka kritikal sa kondisyon niini. “Wala pa ma-determine kung unsay hinungdan ato. Wa pa say impormasyon kun duna bay nakainom sa duha (ka mga drayber),” dugang sa maong polis. (IBM) (BANAT NEWS)