Davide nakauyon unta kang Espino

CEBU, Philippines — Walay kasayuran si Gobernador Hilario Davide III sa tinud-anay nga rason nga girelibuhan si Chief Supt. Jose Mario Espino isip director sa Police Regional Office-7.

Apan si Davide nagkanayon nga mubo ra kaayo ang unom ka buwan nga nahimo siyang labaw sa kapolisan sa rehiyon.

Si Espino girelibuhan sa iyang katungdanan sa niaging semana, duha ka adlaw sa wala pa ang Sinulog.

Siya gipaubos sab sa imbestigasyon sa Kampo Crame tungod sa giingong korupsiyon sa PRO-7 ug giingong nagdawat og payola gikan sa illegal gamblers.

Taliwala sa maong kontrobersiya, ang gobernador nagtuo nga maayo ang performance ni Espino sa rehiyon 7.

Si Espino gihulipan ni Chief Supt.  Robert Quenery kinsa gikan sa Tuguegarao sa Cagayan Valley Region. (Le Phyllis F. Antojado/GMR)

Tulo sa aksidente sa Alegria kritikal pa

Giklaro sa hepe sa Alegria Police Station, Senior Inspector Efren Diaz Jr. nga buhi ang tulo ka gikatahong kritikal nunot sa aksidente sa Legaspi, Lungsod sa Alegria.

“Walang katotohanan yun. Mali ang naitawag na report sa atin vinerify sa ating investigator kahapon sa ospital,” matud ni Diaz.

Sumala pa sa imbestigador sa maong kaso, Police Officer 3 Eduard Bellarte, nga dihang ila gibisita niadtong Domingo, anaa sa Intensive Care Unit sa usa ka pribadong tambalanan sa Dakbayan sa Sugbo ang tulo ka biktima.

“Pag-adto namo conscious sila,” matud ni Bellarte.

Nasayran nga pito sa napulo ka langyaw ug Pinoy nga mga medical practitioners ang nakalas sa nabangga nga van sa punoan sa Mahogany niadtong Sabado sa hapon human nakatagpilaw ang drayber ug tag-iya niini nga si Gilbert Dela Cruz, 44, taga Guiwanon, Argao.

Sa laing bahin, tulo ang grabeng naangol nga nadasmagan og sakyanan sa ilang paglabang sa dulhogon nga bahin sa Marcelo Fernan Bridge sa Pusok, Dakbayan sa Lapu-Lapu alas 9 kagahapon sa buntag.

Si Police Officer 2 Milven Cosedo, field investigator sa Traffic Division sa Lapu-Lapu City Police Office, niila sa mga biktima nga sila si Estepane Godinez, 24, taga Gun-ob; Jayson Brochellm, 29, taga Maribago ug ang usa ka wala hiilhi nga babaye nga maoy nagrabehan.

Matud ni Cosedo nga gimaneho ni Victoriano Atamosa Dupay, 54, taga Datag, Maribago sa maong dakbayan, ang usa ka pribadong sakyanan gikan sa Dakbayan sa Mandaue.

Kalit nga nilabang ang mga biktima ug ulahi na nga naka-brake hinungdan nga sila nadasmagan.

Dali nga gidala sa ambulansiya sa Philippine Red Cross ug Emergency Rescue Unit Foundation ang mga biktima sa Vicente Sotto Memorial Medical Center sa Dakbayan sa Sugbo.

Dugang ni Cosedo nga ang ikatulo nga biktima nga nagrabehan ang wala pa nila nakuha ang pangan tungod kay ubos pa kini sa higpit nga pag-atiman sa mga doktor.

Ang drayber sa nakadasmag nga sakyanan nitahan sa kapolisan ug andam sa pagtubag sa gastohan sa mga biktima sa ilang pagpatambal. (BANAT NEWS)