Party drugs nasakmit, 8 sikop

CEBU, Philippines — Sikop ang walo ka tigpahuyot ug tiggamitan og party drugs atol sa buy-bust operation sa dalan E. Benedicto, Dakbayan sa Sugbo niadtong Biyernes sa gabii.

Nagsugod ang operasyon alas 8 sa gabii sa usa ka pension house diin subject sa mga awtoridad ang usa ka Claude Bernard Deen Peña.

Matod sa deputy chief sa Regional Intelligence Division, Josefino Ligan, nga nadiskubrehan nga ang mga napalgang ecstasy mao ang gitawag nga Barcelona ecstasy tungod sa iyang desinyo nga adunay simbolo sa Barcelona nga football team.

Lakip sa nasikp ang laing lima nga sila si Diana Rose Cabiling Revellas, 21, taga Binlod, Argao; Ann Marielle Villahermosa, 26, taga Calajoan, Minglanilla; Justin Santillan, 21, taga Basak Bontores, Cebu City; Kevin Caballero, 25, taga Gun-ob, Lapu-Lapu City, ug si Jaybee Ocat, 20, taga Malabuyoc, Cebu.

Nakuha gikan sa grupo ang 16 ka tabletas sa ecstasy ug gibana-banang mobalor og P16,000.

Si Peña kinsa gitumbok nga tinubdan sa maong mga ecstasy nibutyag sa mga awtoridad nga gikan sa usa ka Pamela Gasinas ang iyang supply.

Ang Police Regional Office-7 nikompirmar nga ang maong mga ecstasy nga ibaligya ni Gasinas target sa usa ka party sa Dakbayan sa Mandaue.

Matud pa nga gibutyag sab ni Gasinas nga ang supply gikan sa usa ka Ryan Didaton, lumad nga taga Iligan City, kinsa nasikop sab sulod sa kwarto sa usa ka hotel sa may Mango Avenue ug nakuhaan kini og 28 ka tabletas sa ecstasy.  Si Ligan niingon nga gipalapdan nila ng imbestigasyon kon may koneksiyon ba ang mga dinakpan nilang Richard Ngo Go ug Benjamin Yap kinsa nakuhaan sab og mga tabletas sa ecstasy sa buy-bust operation. (BANAT NEWS)