Archbishop Palma nahinangop sa taga Opon
CEBU, Philippines — Gihangop ug gikalipay ni Cebu Archbishop Jose Palma ang paghugop sa liboan ka Oponganon nga nisugat ug niapil sa mga kalihukan sa pag-abot sa Balaang Bata ug Mahal nga Birhen sa Guadalupe una gipahigayon ang fluvial procession kagahapon sa buntag.
Matud ni Palma nga dako kaayo ang iyang kalipay human iyang nakita ang bagang duot sa mga Oponganon nga nisugat ug niapil sa mga kalihukan sa pagdawat sa Balaan nga Bata nga si Señor Sto. Niño ug Mahal nga Birhen sa Guadalupe diin nagpakita kini sa ilang pag-apil sa mga kalihukan sa Fiesta Señor.
Dugang pa ni Palma nga base sa iyang nasaksihan, malipayon dili lang ang mga taga Lapu-Lapu apan lakip usab ang mga nisaksi nga gikan sa lain-lain nga lugar nga nitambong sa kalihukan.
Sumala pa ni Palma nga iya usab tan-awon sunod tuig atol sa mga plano sa kapistahan ang tinguha sa mga Oponganon nga mahibalik gihapon kini sa maong lugar.
Ang Arsobispo lakip sa nisakay sa BRP Agta diin luwan ang Balaan nga Bata ug Mahal nga Birhen sa Guadalupe padulong sa Dakbayan sa Sugbo. (BANAT NEWS)
- Latest
