Bawal ang bag nga dili makita sa gawas ang sud

CEBU, Philippines — Giawhag karon sa Cebu City Police Office ang mga manguyog sa Solemn Procession karong adlawa ug sa Sinulog 2018 Grand Parade ugmang adlawa nga transparent bags lang maoy gamiton  alang sa seguridad.

Ang Officer-in-Charge sa Cebu City Police Office nga si Senior Supt. Julian Entoma miingon nga ang kapolisan gimandoan nang daan nga maghimo og random inspection niadtong mga bags nga dili maklaro ang sud nga moresulta unya sa kahasol.

"Hangyoon gyud sa polis nga ipa-open ang backpack ilabi na kadtong wala makasugod gyud sa prosisyon (kadtong mobagat ra). Kung mahimo transparent nga bag aron makita ang unsay sulod," si Entoma miingon.

Matud pa nga kini parte kini sa gipatumang Major Security Framework sa Police Regional Office 7.

Giingong mas daghang mga polis ang mobantay sa mismong Sinulog gumikan sa magsingabot nga mga polis nga gi-augment gikan sa mga Provincial Police Offices ubos sa rehiyon.

"Kung ganina (sa Walk with Mary ug Traslacion kagahapon) heavy ang security forces, mas heavy ang sa Sinulog tungod sa mga augmentations," si Entoma mibutyag.

Dugang gibutyag sa maong opisyal nga ini og hapon, laing batch na usab sa mga polis ang mobantay aron kadtong mga nagbantay sa buntag makapahuway ug aron usab nga ang magbantay presko pa gihapon ug alisto.

"Giandaman na gyud na kay sa una ang polis dili na ka sustain tungod sa kakapoy," si Entoma midugang.

Buot sab ipaabot ni Entoma ang pahinumdom ngadto sa publiko nga bawal nang magpalupad og balloons, magpabuto ug ang paginom- inom sud sa 300 meter radius.

Samtang gipahibawo sa Operations Head sa Cebu City Transportation Office (CCTO) Francisco "Isko" Ouano nga alas 10 karong buntag sirad-an na ang mga dalan nga agian sa Solemn Procession.

Ang Solemn Procession magsugod sa Basilica Minore del Sto. Niño, paingon Osmeña Boulevard, General Maxilom Avenue, New Imus Road, M.J Cuenco Avenue pabalik sa simbahan.

Matod ni Ouano, ang buhaton sa CCTO mao katong dalan nga agian sa procession sirad-an ug kun makalabay na ang tanan buksan  kini og balik para sa mga sakyanan. Gihangyo sa CCTO ang mga tawo nga wala'y tuyo sa maong mga dapit nga dili na lang moadto aron malikay sa kahuot sa dagan sa trapiko.

Samtang si Konsehal Dave Tumulak, Chairman sa Committee on Public Order and Safety miingon mipahimangno sa mga mosalmot sa solemn procession nga dili kalimtan ang panagang sa init ug uwan ug kadtong mga dunay gi-maintain nga tambal moinom gyud daan. (BANAT NEWS)