Gun ban ipatuman; Signal pawngon?

CEBU, Philippines — Gipahibalo sa kanhi regional Director sa Police Regional Office-7 Chief Supt. Jose Mario Espino nga ang kadagkoan sa Philippine National Police sa kampo Crame  mitugot nga pawngon ang signal sa mga cellphones atol sa Sinulog.

Samtang gipahibalo usab sa bag-ong Regional Director sa PRO-7 nga si Chief Supt. Robert Quenery nga gipirmahan na ni Chief PNP Ronald 'Bato' Dela Rosa ang request nilang pagpatuman og gun ban sa tibuok Dakbayan sa Sugbo sa maong adlaw.

"The ban from carrying firearms within Cebu City will take effect from January 19 to 21. It has just been signed by the chief PNP today," matud pa ni Quenery.

Ang pagpatuman sa gun ban paniguro kini nga walay insidente labot sa pagpamusil ang mahitabo atol sa maong kasaulogan.

Kabahin sa pagpawong sa signal sa cellphones, si Espino miingon nga bisan og miaprubar ang PNP wala gihapoy kasigurohan kon ilaha kining himuon.

Matud pa niya, mag-agad lang gihapon sila kon adunay masagap nga hulga sa seguridad ang kapolisan ilabi na ang Regional Intelligence Division.

Apan siya miawhag sa publiko nga managana ug mangandam na lang daan sa posibleng pag-shutdown sa cell sites

Si Cebu City Councilor Dave Tumulak, Deputy Mayor for Police Matters ug Executive Committee Chairman sa Sinulog 2018 mitambag sa publiko nga maghimo daan og contingency plan mahitungod sa komunikasyon aron andam kun pananglitan duna gyu’y mahitabong signal shut down.

Sa Sinulog 2017, ang kapulisan mipatuman og signal shut down sa rota sa Sinulog diin kabahin kini sa security plan sa mga tinugyanan sa balaod.

Bisan sa pasidaan, daghan gihapon ang nakalitan ilabi na ang mga emergency personnel ug ang pagresponde sa mga alarma kay sagad sa mga polis nagsalig lang sa ilang mga cellphone tungod sa kakuwang sa mga handheld radios.

Matud ni Tumulak ang siyudad ug ang Sinulog Foundation Incorporated andam mosuporta kon unsay plano sa kapulisan may labot sa public order ug safety.

Samtang gi-meeting usab ni Tumulak ang tanang mga contingents ug ilang mga communicators nga dili mobiya sa mga choreographer ug sa mga head sa contingents aron sila maoy maghatud sa mga instructions  gikan sa SFI.

Masaligon si Tumulak nga dili maapektahan ang parada  kon pawngon ang signal sa cellsites kay aduna may mga radio communicators nga mogamit og handheld radios alang sa mga participants ug lahi sab ang komunikasyon sulod sa Cebu City Sport Center. Nakigkita usab si Tumulak sa mga kadagkoan sa telecommunication companies aron kon pawngon ang signal, ang Cebu City ra gyud maoy maapektahan ug way labot ang ubang mga dapit dili sama sa nahitabo sa nakalabay nga tuig nga hasta sila napagan. (BANAT NEWS)