20-anyos nakailad og kapin P200,000
CEBU, Philippines — Nadagit sa 20-anyos nga babaye ang kapin sa P200 mil pinaagi sa pagpatuo nga siya supplier sa iPhone nga data-data.
Ningreklamo ang usa sa biktima sa kapolisan sa Dakbayan sa Talisay human pirme lang kini saad-saaran sa suspek nga iuli ang kwarta apan wala gyud kini nagpatim-aw. Ang suspek giila nga si Marie Joyce Guron, taga Sto. Tomas, Davao Del Norte.
Gitataw sa biktima nga si Alexa Tanajura, 22, taga Barangay Lagtang, Siyudad sa Talisay, nga dili lang kay siya apan daghan sila ang biktima.
Pinaagi sa chat, ang suspek human nakuha ang kwarta nipasalig nga ipadala ang mga unit aron i-resell apan sa kadaghan sa order usa ra kabuok iPhone ang niabot kang Tanajura.
Matud ni Tanajura nga dako niyang problema ang pag-uli sa kwarta sa iyang mga customer.
Daghan na ang nagpangita sa suspek pinaagi sa social media apan wala gyud kini makit-i.
Nipasalig ang kapolisan nga pangitaon ang suspek dungan ang pahimangno nga dili magpasagad og padala og kwarta ilabi na pinaagi sa social media. (GMR) (BANAT)
- Latest
