BRP Agta barko sa paglaum

CEBU, Philippines — Barko sa Philippine Navy sa Naval Forces Central (Navforcen) nga kargahan sa imahen sa Senyor Sto. Niño ug Birhen sa Guadalupe gamit dili lamang panahon sa gubat kondili hasta sa paghatag og paglaum sa mga biktima sa katalagman.

Ang ilang barko magsilbing  galeyon atol sa fluvial procession  ugmang adlawa.  Ang  BRP Agta (LC-290) maoy kargahan sa duha ka imahen ug dali lamang nga makita sa mga deboto ini og sugod na sa prosisyon.

Ang BRP Agta mao ang kaniadto HMAS Balikpapan (L 126) samtang naa pa kini sa Royal Australian Navy. Tuig 2016 gipalit kini sa Pilipinas kauban ang laing duha ka mga kaparehas gihapon nga klaseng barko nga mao ang HMAS Wewak ug HMAS Betano nga mao na karon ang BRP Waray (LC-288) ug BRP Iwak (LC-289). 

Ang tulo pinalit sa panahon sa administrasyong Aquino human nga nakita ang kakuwangon sa navy og barkong magamit sa mga humanitarian operations nga ilang nakita dihang naigo ang nasud sa bagyong Yolanda.

Una pa ang pagkapalit niini, laing susamang barko gihapon gikan sa RAN ang gidonar sa Australia human sa bagyong Yolanda.

Kini mao ang HMAS Tarakan nga karon mao na ang BRP Batak (AT-299) ug HMAS Brunei nga mao na karon ang BRP Ivatan.

Ang lima ka landing crafts makakarga og tag 180 toneladang mga gamit o 400 ka mga tropa ug nadestino karon sa Sealift Amphibious Force sa Philippine Navy.

Ang HMAS Balikpapan (BRP Agta) kauban sa HMAS Betano (BRP Iwak) ang unang barko nga niresponde ug naghimo og humanitarian mission sa Darwin sa Australia dihang naigo kini sa Cyclone Tracy niadtong 1974.

Ang mga landing craft  sa navy gipangalan gikan sa nagkalain-laing mga etnikong tribu sa     Pilipinas.

Sa nasayran nga ang Senyor Sto. Niño nahimo nang kabahin sa mga sakop sa Philippine Navy ilabi na gayud sa mga nadestino dinhi sa Sugbo ug dako kaayong garbo ug kalipay kanila nga sila maoy gitahasan karon nga modala sa imahen.

Sud sa 37 ka tuig nga pagpahigayon og fluvial procession ang yate  nga gipanag-iya  sa pamilya ni anhing Ernesto  Ouano maoy pirmeng gamiton ug anha kini pirme manukad sa ilang pribadong wharf sa Mandaue City.

Apan karong tuiga, adunay gihimong mga kausaban human ang mga paring Agustino sa Basilica Minore del Sto. Niño nakahukom sa paghatag usab og higayon sa uban nga mga nanag-iya og shipping companies dinhi sa Sugbo.

Gawas pa niana, ang kaniadto Traslacion nga kutob lang sa Mandaue City, karon giapil na sa rota ang Lapu-Lapu City ug anha na manukad sa ilang siyudad ang fluvial procession. (BANAT)