Bleachers palukatan og permit

CEBU, Philippines — Hangtud ugma ang pagpalukat og permit alang niadtong mga tag-iya og pribadong luna nga magbutang og bleachers alang sa manan-aw sa Sinulog grand parade. Sigun ni Konsehal Dave Tumulak, executive committee chairman sa Sinulog 2018 nga ang buhaton lang sa mga hingtungdan mao ang pag-submit sa ilang structural design ug mokuha og permit sa Office of the Building Officials.

Giklaro sa konsehal nga kinahanglang dili makababag sa sidewalk o kaha sa pedestrian.

Tumong sa paghimo niini sa siyudad aron malikayan ang disgrasya ug dili maayong panghitabo.

Kadtong mga magbutang og bleachers nga walay permit, wala maka-submit og structural design ug walay pagtugot sa OBO, gub-on kini sa taga OBO, General Services Office ug Prevention, Restoration, Order, Beautification, Enhancement (PROBE).

Samtang gipahinumduman usab ang katawhan sa dili pagpataka og labay sa basura atol sa Sinulog.

Kapin sa 400 ka Barangay Environmental Officers (BEO) nga ipakatap sa kadalanan atol sa Sinulog ang modakop niadtong mga magpataka lang og labay sa basura. (BANAT NEWS)