Pagpangolekta sa mga porters ipasusi
CEBU, Philippines — Giawhag sa Provincial Board ang Cebu Ports Authority sa pag-imbestigar sa giingong sobra nga pangolekta sa mga porters sa mga pantalan ngadto sa mga sumasakay sa barko.
Usa ka resolusyon ang gipasar niadtong Lunes nga giduso ni Bokal Thadeo Jovito “Jonkie” Ouano labot sa maong awhag.
Kini human nakadawat siya og reklamo nga dunay pasahero gikan sa Sugbo padulong sa Mindanao ang gipabayad og daku sa porter nga nibitbit sa iyang bagahe ug giingnan pa nga mao gyud ang ilang lagda.
Matud ni Ouano nga kinahanglang masusi ang reklamo aron masuta kung pila gyud ang gitugot nga pangolektahon sa mga porters. Laing insidente mao nga usa ka porter sa usa ka kompaniya sa barko ang nitug-an nga ilang timbangon ang kargamento ug pangayoan nila og P2 sa matag kilo diin sumala pa ni Ouano nga mas ubos hinoon sa tag P100 matag bag.
Nasayran usab nga ubang porters makigsabotsabot sa mga pasahero nga gikan sa barko ug ang mahitabo nga mas dako hinoon ang mabayran kaysa niadtong padulong pa mosakay.
Sugyot ni Ouano nga adunay pareho nga bayranan ug timbangon ang kargamento aron dili lainlain ang kolektahon sa porter.
Ang maong standard nga bayranan sumala pa ni Ouano nga angayang ipahibawo sa publiko ug makita sa mga pasahero aron sayon ang pagpangutana.
“There is a need to actually check on the issue that porters are overcharging on the fees and there is a need for CPA to check and review if the fees being charged are fair and reasonable to the public,” dugang ni Ouano. (BANAT NEWS)
- Latest
