Laing sunog niulbo sa Duljo

CEBU, Philippines — Nikabat sa P200 mil ang gibana-banang danyos sa sunog nga niulbo kagahapon sa buntag sa may Carlock Street, Sitio Wildflower, Duljo-Fatima, Dakbayan sa Sugbo.

Ang sunog nagsugod sa panimalay ni Leticia Jeitutua diin gipaubos pa sa imbestigasyon ang hinungdan.

Matud ni Senior Fire Officer 1 Dina Marikit sa Cebu City Investigation Department nga siyam ka panimalay ang hingpit nga naugdaw ug wala hinooy gikataho nga nakalas o naangol sa maong sunog.

Ang sunog kagahapon mao ang ika-napulo nga nadawat sa kabomberohan sa dakbayan sugod niadtong Enero 1 hangtud kagahapon.

Lakip sa mga dagko nga sunog ang sa Metro Ayala Center ug Barangay Pasil.

Samtang ang pagka-kuryoso ug ang dili pagtabang sa mga tawo sa mga bombero kung adunay sunog ang usa sa nakita nga problema sa Cebu City Disaster Risk Reduction and Management Office (CCDRRMO).

Matud sa pangulo sa CCDRRMO, Nagiel Bañacia, nga kini ang ilang gitawag og “disaster tourism” diin ang mga tawo igo ra magtan-aw o mamugos nga motan-aw sa sunog kaysa sa motabang.

“Kung mao ni ang attitude sa mga tawo mag-expect gyud ta nga modaku kanunay ang sunog kay ang tanan wala man motabang, ang community dili man motabang, pasagdan ra man nila ang bombero mopatay sa kalayo, sa ilang part nagpuno sila sa congestion,” matud ni Bañacia.

Tungod niini, gibutyag ni Bañacia nga aduna na silay giplano nga i-cordon ang lugar kung adunay sunog ug igo na lang ni nilang i-implementar.

“Atong buhaton is mangandam ta ug mga bombero sa atong disaster office nga mo-cordon if dili gani sila maminaw under sa balaud basta adunay fire operations, ang bombero naay authority modakop sa mga tawo,” matud ni Bañacia. (BANAT NEWS)