30 estudyante apil sa nasunogan
CEBU, Philippines — Mga biktima sa sunog sa barangay Pasil, Cebu City anha gipahiluna sa 28 ka mga classrooms sa Pasil Elementary School ug Night High School.
Nasayran nga ang mga nasunogan mga residente sa Sitio Lawis, 1 ug 2, sa maong barangay nga gibanabanang moabot og kapin 700 ka pamilya.
Kini ang gibutyag ni Lilia Ramirez, Principal sa Pasil Elementary School nga nahinabi sa Banat News bisan pa niini aduna gihapoy klase sa Pasil Elementary School.
Ang 18 ka mga lawak saringan mao lang ilang gigamit aron lang dili mabiyaan sa mga bata ang ilang pagtuon.
Matud pa ni Ramirez, tungod kay gigamit man ang ilang 27 ka classroom, aduna silay tulo ka shifting diin makahimo pa usab paggamit ang mga high school nga magsugod sa alas sais sa buntag ngadto sa alas-10, alas-10 ngadto sa alas-2 sa hapon, alas-2 ngadto sa alas-6 sa gabii.
Dugang pa ni Ramirez, aduna na silay initial nga 30 ka mga tinun-an nga nalista nga apektado sa sunog ug mohangyo sila sa DepEd nga matabangan ang mga bata.
Hangyoon usab ni Ramirez ang siyudad nga kung mahimo dili dugayon ang pag-istar sa mga nasunogan sa ilang eskuylahan kay maapektahan ang pagtuon sa mga bata.
Gitug-an ni Ramirez, karon adlaw nga Biyernes, human sa ilang halad sa Balaan nga Bata sa Basilica Minore del Sto. Niño di na sila maghikay alang sa pista kay ilaha na lang kining lutoon aron ipakaon sa mga bata ug ipaubos usab nila sa debriefing ang mga kabataan.
Samtang si Dr. Bianito Dagatan, Cebu City Schools Superintendent nitug-an nga magpaabot pa sila sa assessment sa Cebu City Disaster Risk Reduction Management Office aron masayran nila kung kanus-a ra gyud kutob magamit ang tulonghaan ilabi na adunay klase nga nagpadayon. (BANAT NEWS)
- Latest