Gwardiya milugos sa19-anyos nadakpan
CEBU, Philippines — Gidakop sa kapolisan ang usa ka gwardiya sa simbahan sa Santa Teresa sa Barangay Poblacion, dakbayan sa Talisay human gipasanginlang nilugos sa 19 anyos nga dalaga niadtong Domingo sa kaadlawon. Ang biktima nitudlo ni Joseph Saurdino, 39, nga taga Siyudad sa Naga nga niamong-among kaniya.
Si SPO1 Shidney Taboco sa Women’s and Children’s Protection nagkanayon nga nagpuyo sa balay sa iyaan ang biktima apan dihang nakasab-an naglayas kini ug anha nagabhian ug naabtan og uwan nipasilong sa tindahan sulod sa compound sa Sta. Teresa de Avila Parish.
Dihang lawom na ang gabii ug wala gihapon mituang ang uwan nananghid kini sa gwardya nga anha na lang matulog sa tindahan. Apan adto siya gipakatulog niini sa covered court.
Giingong gipakaon sa suspek og pan ug softdrinks ang biktima apan human niini naluya kini ug di kadaog sa iyang lawas. Diha na nahitabo ang paglugos.
Tungod sa kaluya, ang gwardiya pa maoy mipasuot og balik sa sinina niini ayha gibiyaan. Sa dihang nauli-ulian, nigawas ang biktima ug nisakay og traysikol nagpahatud sa ilang balay ug didto gisumbong ang nahitabo.
Ang biktima ug iyaan nidangop sa kapolisan ug gidakop ang suspek. Nakuha gikan kaniya ang .38 revolver nga service firearm nga adunay bala apan wala kini lisensya, samtang wa usab kini makapakita og dokumento sa ilang security agency nga Flying Ace.
Nagtuo si Taboco nga posibleng gisagulan og pangpaluya ang softdrinks nga giinom sa biktima. Ang suspek nihimakak sa mga pasangil kaniya. (BANAT NEWS)
- Latest