Upat nabakunahan nasakit og dengue
CEBU, Philippines — Gibutyag sa Provincial Health Office (PHO) nga upat ka bata ang nabakunahan og anti-dengue vaccine sa Department of Health ang nag-dengue gihapon atol sa Pasko.
Matud ni Dr. Rene Catan, pangulo sa PHO, nga tulo niini gikan sa Lungsod sa Tuburan ug ang usa gikan sa Pinamungajan.
Gitataw ni Catan nga dili hinoon grabe ang kaso ug naayo na kini karon ug padayong gi-monitor.
Si Catan nibutyag nga moabot gyud sa 162,000 ang nabakunahan og Dengvaxia sa Probinsiya sa Sugbo sumala sa DOH.
“Out of 162,000, we would want to know definitely kung kinsa gyud didto ang naigo na before the vaccination,” matud ni Catan.
Base sa report nga ang mga nabakunahan og Dengvaxia adunay risgo kadtong wala pa natakbuyi apan na-immunize sa maong dengue vaccine.
Samtang 63,108 ka Dengvaxia vaccines ang nabalik na sa DOH-7 human kini gipa-recall sa ulohang buhatan gikan sa kalungsuran nga nahatagan niini.
Matud ni DOH-7 Director Jaime Bernadas nga duha na lang ka lagyo nga lungsod ang wala pa naka-uli sa ilang vaccines nga padayong gipangolekta.
Gitug-an ni Bernadas nga human sa pagpanghatag nila og Dengvaxia vaccines, aduna na silay natala nga 25 ka kaso nga nasakit og dengue apan walay nagrabehan.
Giklaro sab ni Bernadas nga ang mga pribado nga tambalanan ang mohatud niini sa ilang supplier ug nakig-alayon sila niini tungod kay motabang usab kini kanila sa higayon nga aduna silay mga pasyente nga matala. (BANAT NEWS)
- Latest
