Tabunok market buksan sa Enero 12
CEBU, Philippines — Sa mosunod nga napulo ka adlaw hayan buksan na ang bag-ong modernong merkado sa Tabunok, Dakbayan sa Talisay.
Kini human si Engr. Julius Cabunillas, project manager sa Tuanson Construction nga maoy kontraktor sa merkado, nipadayag nga 80 porsiyento na nilang nahuman ang maong proyekto.
Matud niya nga substantially mahuman na ang maong proyekto apan mahimo na kining magamit.
Si Mayor Eduardo Gullas nagtinguha nga karong Enero 12 nila buksan ang bag-ong merkado atol usab sa kasumaran nga nahimong siyudad ang Talisay.
Ang merkado sa Tabunok gisugdan sa pagtrabaho niadtong Septiyembre.
Si Cabunillas nitataw nga halos mahuman-human na gyud ang mga stalls ug mosiga na ang mga suga apan ang stalls para sa karenderya mao na lang ang ilang tiwason.
Ang merkado sa Tabunok ang nahimong dakong isyu sa niaging mga administrasyon human gibalhin kini ngadto sa Barangay Lagtang.
Wala nakauyon ang mga manindahay ingon man mamalitay tungod sa kalayo hinungdan nga panahon ni kanhi mayor Johnny de los Reyes iyang gipabalik ang mga manindahay sa merkado sa Tabunok.
Sa administrasyon ni Gullas wala na niya gipangitaan og laing lugar ang mamaligyaay kun dili iya na lang gipaayo ang merkado sa Tabunok. (GMR) (BANAT NEWS)
- Latest