Intern sa UV Gullas College of Medicine gipasidunggan

CEBU, Philippines — Kadtong medical post-graduate intern (PGI) sa University of the Visayas–Gullas College of Medicine nga mitabang sa biktima sa usa ka aksidente sa Metro Rail Transit 3 didto sa Manila kaniadtong Nobiyembre 14, gipasidunggan kaniadtong Sabado sa gabii.

Si Dr. Charleeane Flora Mae Jandic maoy una nga miresponde ug mitabang sa usa ka babaye nga nawad-an sa iyang usa ka bukton sa aksidente sulod sa Metro Rail Transit 3. Gigamit niya ang iyang nakat-onan sa pagtungha sa University of the Visayas - Gullas College of Medicine aron pagtabang sa biktima.

Matud ni Jose “Dodong” Gullas, executive vice president sa UV-Gullas College of Medicine, nga dalaygon kaayo ang gihimo ni Jandic ug nakahatag kini og dakong garbo sa ilang tunghaan.

Atol sa Christmas party sa mga medical students sa tunghaan kaniadtong Sabado, gihatagan ni Gullas og usa ka plaque ug cash gift si Jandic, kinsa wala magtuo nga gantihan siya sa iyang nahimo. Matud ni Jandic nga igo ra siya nga mituman sa iyang katungdanan nga mao ang pagserbisyo kon adunay nanginahanglan sa iyang kahibalo. Matud ni Jandic nga wala gyud siya magpaabot nga gantihan sa iyang nahimo.

“Actually, okay ra gyud ko nga wala’y awarding kay wala nako kadto gibuhat para mangolekta’g award,” matud ni Jandic, kinsa lumad nga taga Polomolok, South Cotabato.

Matud ni Gullas nga garbo kaayo siya nga nakabaton og tinun-an nga migradwar pagka doktor sa iyang tunghaan nga susama og kinaiya ni Jandic. Gani, gitanyagan ni Gullas si Jandic nga motudlo sa UV-Gullas Medical School.

“I’m very happy. We’re praying for her. We are deeply grateful and honored for a Visayanian. I’m offering Doctor Jandic a teaching profession,” matud ni Gullas.

Gisaysay ni Jandic nga atol sa hitabo, gitugyan niya ang babayeng biktima ngadto sa mga miresponde nga emergency responders, apan mihangyo kini kaniya nga mokuyog na lang sa pagdala nila sa biktima sa Makati Medical Center.

Atol sa maong higayon nagdali gani unta si Jandic kay adunay nagpaabot kaniya. Bisan ang kadagkoan sa Philippine College of Surgeons miyukbo sa gihimo ni Jandic mao nga gidapit siya nga motambong sa usa nila ka sesyon sa ilang annual convention.

Migradwar si Jandic sa kurso kaniadtong Mayo, ug humanon na lang niya ang usa ka tuig nga internship sa Chinese General Hospital sa Manila kay kini usa ka rekisito nga makakuha siya og licensure examinations pagka doktor. (BANAT NEWS)