Mas daghan nanimba sa ikaduhang adlaw sa Misa de Gallo
Ang gene manager sa DyRF ug Power FM, Fr. Roberto “Bobby” Ebisa, kuyog nga niselebrar sa ikaduhang Misa de Gallo kagahapon sa kaalawon sa Archdiocesan Shrine of San Vicente Ferrer Parish sa Dakbayan sa Bogo nga gidumala ni Fr. Nelson Ortizano, sakop sa team ministry. Rowena D. Capistrano
CEBU, Philippines — Paghatag og iwag sa tawo nga anaa sa kangitngit maoy gihatagan og dako nga papel sa ikaduhang adlaw sa Misa de Gallo nga naghisgut sa hataas nga kaliwatan sa Ginoo nga manluluwas.
Bagang duot sa katawhan ang nitambong kagahapon sa kaadlawon sa ikaduhang Misa de Gallo sa Archdiocesan Shrine of San Vicente Ferrer Parish sa Dakbayan sa Bogo nga gidumala ni Fr. Nelson Ortizano, sakop sa team ministry uban sa visiting priest, Fr. Roberto “Bobby” Ebisa, general manager sa DyRF ug Power FM ug kasamtangang pangulo sa Kapisanan ng mga Brodkaster sa Pilipinas (KBP) Cebu Chapter.
Matud ni Fr. Ortizano nga kagahapon ang mas daghan nga tawo tungod kay nilurang-lurang na ang hangin ug uwan kung ikomparar sa unang adlaw diin anaa pa ang bagyong Urduja ug wala pa gyud siga sa linya sa kuryente.
Sumala pa ni Ortizano nga silang kaparian adunay mga Misa nga ipahigayon sa mga sentro nga barangay matag alas 4:30 sa kaadlawon diin ang mga tawo nga silingan sa sentro nga barangay adto magtapok aron sa pagtambong sa Misa de Gallo.
Sa wali ni Ebisa gipahimug-atan niini bisan sa kataas sa kutay sa henerasyon sa Ginoo diin nisaad kini nga magpadala og manluluwas niabot gyud kini diin motuman gyud kini sa iyang saad inig abot sa iyang panahon.
Awhag ni Ebisa sa mga nanimbahay nga bisan sa kataas usab sa kutay sa ilang henerasyon dili lang unta ilhon ang mga maayong tawo apan lakip usab kadtong mga badlungon nga sakop sa banay tungod kay bisan adunay badlungon aduna gihapoy kahayag ug kutay nga magdala og kaluwasan.
Gitug-an ni Ebisa nga bisan usa ray kahayag apan dako na kaayo kini og tabang hinungdan maoy angay nga misyon sa tawo ang mahimong kahayag ngadto sa iyang kaigsuonan nga naglakaw sa kangitngit ug kahayag diha mismo sa ilang kaugalingon nga panimalay sama ni Kristo nga nisiak sa kangitngit.
Samtang human sa Santos nga Misa gisunod usab ang paghatag og init nga lugaw lakip usab ang mga nipasilong sa Patria sa Simbahan sa Bogo diin dili mominus gatusan ka pamilya sa Barangay Banban ang nakapainit. (BANAT NEWS)
- Latest
