Hapon nag-drive nakatagpilaw nabangga

CEBU, Philippines — Nadisgrasya ang usa ka Hapon nga nagmaneho og awto sa may Barangay Macaas, Lungsod sa Catmon kagahapon sa kadlawon kay kini nakatagpilaw.

Ang driver sa Toyota Vios mao si Muneyuki Toshio, 37-anyos, temporaryong nagpuyo sa Barangay Mabolo, Dakbayan sa Sugbo kinsa kuyog sa iyang higala nga babaye padulong unta sa Lungsod sa Santa Fe, Isla sa Bantayan.

Matud ni Police Officer 1 Jaymar Arigo, imbestigador sa Catmon Police Station, nga nakatagpilaw si Toshio ug natamakan niini ang accelerator dayon nibangga sa stockpile kilid sa dalan nga iya sa Department of Public Works and Highways dayon lahos ngadto sa nagbungdo nga yuta kilid sa usa ka panimalay.

Sumala pa ni Arigo nga swerte ra sab ang nagmaneho ug ang sakay niini nga wala ray kadaut nga naangkon sa kalawasan.

Dugang ni Arigo nga dili hinoon hilan ang maong dapit apan disgrasya lang nga nakatulog ang driver hinungdan nga sila nabangga.

Ang duha ka sakay sa auto tak-om ra sab hinoon sa maong insidente. (BANAT NEWS)