Greyhound sa Danao jail way nakuha

CEBU, Philippines — Napakyas ang kapolisan ug mga sakop sa Bureau of Jail Management and Penology (BJMP) sa pagsakmit og mga kontrabando sulod sa mga selda sa Danao City Jail. Kini atol sa ilang gipahigayon nga greyhound operation alas 3 pasado sa niaging Sabado sa kaadlawon.

Ang maong operasyon sa kapolisan ang natigayon pinaagi sab sa koordinasyon sa buhatan sa Philippine Drug Enforcement Agency (PDEA)-7 uban sa mga sakop sa BJMP-7.

Si Police Inspector Jan Ace Layug, deputy chief sa Danao City Police Station, maoy nangulo sa nahisgutang greyhound operation pinaagi sa pagsiksik sa matag selda sa bilanggoan.

Si Senior Police Officer 1 Arnold Labine sa Danao City Police Station niingon nga giseguro nila ang maong pagpangronda nga dili makahigayon sa pagtago sa ilegal nga mga butang ang mga binilanggo sa Danao City Jail.

Nasayran nga nibalik na sa ilang operasyon ang kapolisan sa Dakbayan sa Danao batok sa ilegal nga drugas.

Ang nagsunod-sunod nilang anti-drug operations sa pipila na ka mga adlaw maoy hinungdan sa pagkasikop sa siyam ka pusher nga naglakip sa duha ka pusher nga kabanay sa nabilanggo nga drug lord nga si Alvaro “Barok” Alvaro.

Sa nasayran nga ang kadaghanan sa mga police stations sa kalungsuran ug mga dakbayan ang wala pa gyud makabalik sa ilang anti-drug operation tungod kay gihimo pa nila ang mga pagbansay-bansay sa mga polis nga mahimo nilang sakop sa pagseguro nga kalikayan na ang mahitabo nga pagpangabuso sa kapolisan sa ilang operasyon. (BANAT NEWS)