Tom mangayo og legal opinion bahin consultants
CEBU, Philippines — Mangayo og opinion sa City Legal Office si Cebu City Mayor Tomas Osmeña kun ang City Accountant’s Office angay mo-withhold sa monthly remuneration sa mga consultants nga dili rehistrado sa Philippine Government Electronic Procurement System (PhilGeps).
Sigun sa mayor nga ang mga konsehal sa Barug Team Rama nihimo sa lakang nga dili una i-release ang sweldo sa mga consultants kay matud pa wala sila’y mga consultants.
“Suya lang sila. If I give them their consultants, do you think they’ll do that? Of course not. They are doing the right thing for wrong reason. Nangita lang sila og sala,” sigun ni Osmeña.
Niadtong Martes ang konseho nihangyo sa accountant nga pugngan una ang sweldo sa mga consultants nga dili accredited sa PhilGeps isip rekisitos ubos sa 2016 Revised Implementing Rules and Regulations (IRR) sa Republic Act No. 9184 kon ang Government Procurement Reform Act.
Ang mayor niingon nga nakuha niya ang punto sa mga konsehal sa Barug Team Rama apan kini nagtuo nga dunay bulok politika ang paghimo niini sa oposisyon.
Matud niya nga mangutana siya sa City Legal Office kun ang accreditation gihimo ba sa tibuok nasud.
Si Osmeña niingon nga mahimo niyang i-justify ang pag-release sa sweldo apan kinahanglan nga gitrabahoan kini sa consultants pinaagi sa paghatag og serbisyo sa siyudad.
Nagkanayon kini nga wala siya mohatag og consultants sa oposisyon kay dili sila mohimo og executive functions itandi sa iyang mga kaalyado sa konseho.
Kini niasoy nga naa siya’y 16 ka consultants itandi sa 30 sa nilabay nga administrasyon.
Sa iyang bahin, si Bise Mayor Edgardo Labella niingon nga usa ka saktong lakang nga mangayo og legal opinion ang mayor. (BANAT NEWS)
- Latest
