Pagbalik sa COSAP Drama giaprobahan ni Tomas
CEBU, Philippines — Giaprobahan na ni Mayor Tomas Osmeña ang proposal sa Cebu City Office on Substance Abuse Prevention (COSAP) ang pagbalik sa COSAP Drama sa sunod tuig.
Matud ni COSAP head Garry Lao nga mao kini ang usa sa ilahang pamaagi nga mapakita nila ngadto sa katawhan nga aduna sila’y bag-ong pamaagi sa paghatag ug pagpadangat og mensahe mahitungod sa pakigbatok sa ginadiling drugas.
Si Lao mipadayag sa iyang kahangop nga gi-aprobahan sa mayor ang ilang hangyo sa pagbalik sa COSAP Drama diin matud niya nga ang mensahe sa presentasyon himuon nila kining mas-direkta ug bug-at.
Matud usab ni Lao nga ang pagkigbatok sa ilegal nga drugas usa ka sersyoso nga adbokasiya.
Ang tanang script sa drama ipaubos una kini sa screening tungod kay gusto nila nga ipakita ngadto sa katawhan ang tumong ug mensahe sa drama.
Gibutyag usab ni Lao nga nagka-estroya na sila ni Allan “Goliat” Nacorda nga siya ang kuhaon nga drama director.
Sumala ni Lao nga ilaha pang han-ayon ang mga papeles sa plano ug ipasa ngadto sa city council aron maaprobahan ug iyang hangyoon si Konsehal Dave Tumulak nga mo-sponsor sa resolusyon.
Sa pasiunang panagtagbo ni Lao ug sa presidente sa Association of Barangay Council Konsehal Phillip Zafra ang naulahi misugyot kini nga labing maayo kong “musical play” ang ilahang himuon aron maaghat ang kabataan nga motan-aw sa programa ug awhagon ang Sangguniang Kabataan (SK) sa matag barangay nga maghimo og performing arts group aron molambo ang ilang mga talento ug mamahimo usab sila nga makaapil sa drama. (BANAT NEWS)
- Latest
