Babayeng bombero sama ra sa lalaki

CEBU, Philippines — Gipakita sa mga babaye nga bombero nga kaya nila ang bug-at nga mga ekipo ug ka risgo sa ilang trabaho nga sama sa mahimo sa mga lalaki.

Kini atol sa ikaduhang tuig nga pagpahigayon sa Bureau of Fire Protection-7 sa Female Fire Olympics.

Matud ni Fire Supt. Ronaldo Orbeta, acting BFP-7 chief, nga ang BFP-7 Fire Olympics pagpakita kini nga gihatagan nila og susamang pagtan-aw ang kababayen-an sa ilang ahensya.

Ang BFP-7 adunay 320 ka babayeng kawani, 24 niini anaa sa regional office, 125 sa mga fire stations sa Cebu, 87 sa Bohol, 12 sa Siquijor, 35 sa Negros Oriental ug 16 sa Lapu-Lapu City.

Gani babaye ang hepe sa BFP sa Probinsiya sa Negros Oriental ug kasamtangang Dumaguete City Fire Marshall nga si Supt. Mary Joy Candelario.

Matud ni Candelario nga niumol siya og grupo sa Dumaguete Fire Station diin kababayen-an ang moresponde sa sunog ug babaye sab ang fire truck driver. (BANAT NEWS)