Bag-ong Cebu City Jail tukuron

CEBU, Philippines — Gipahigayon kagahapon ang groundbreaking isip timaan sa pagsugod na sa katukuran sa bag-ong jail building sa Cebu City Jail Male Dormitory sa Barangay Kalunasan.

Ang kalihukan gitambungan nilang Cebu City Mayor Tomas Osmeña, Bureau of Jail Management and Penology Director Deogracias Tapayan; BJMP-7 Regional Director, Chief Supt. Arnold Buenacosa; Assistant Regional Director, Senior Supt. Jolly Taguiam; City Jail Warden, Supt. Renante Rubio ug Konsehal Dave Tumulak, chairman sa committee on public order and safety sa konseho sa siyudad.

Ang upat ka andana nga building mobalor og P84 milyones nga gipaabot nga dakung tabang sa naghuot na nga prisohan.

Sugdan ang pagtukod niini human sa Bag-ong Tuig tungod sa Misa de Gallo nga ipahigayon sa kapilya sa City Jail nga maapektuhan sa katukuran sa bag-ong facility.

Ang building nga tukuron aduna nay igong ventilation nga kaagian sa hangin, matag selda adunay kaugalingon nga pansayan, electric fan, may kapilya ug TB Dots building nga ipahimutang sa roof deck.

Si Osmeña sa iyang bahin nitug-an nga usa ka special nga kalihukan ang pagpahigayon sa groundbreaking sa City Jail tungod kay dugay nang panahon nga kinahanglan ang katukuran sa maong facility.

Samtang tinguha sa mayor ang pagpahimutang og signal jammer sa City Jail ilabi na nga aduna siyay daghang nadawat nga taho may kalabutan sa giingong tinubdan sa drugas ang maong lugar.

Si Tumulak kinsa gitahasan sa mayor sa mga kalihukan sa City Jail nitug-an nga natagbaw ang mayor sa kalihukan sa prisohan apan kinahanglan pa ang dugang improvement niini.

Dugang ni Tumulak nga ang kagamhanan sa siyudad mopahigayon og pagbutang og telephone landline diin libre kining magamit sa mga piniriso ilabi na sa emerhensya ug ang siyudad maoy mogasto niini ug tinguha nila karon ang pagpahimutang sa signal jammer diin wala nay magamit nga linya sa cellphone. (BANAT NEWS)